దిల్లీని ముంచెత్తిన భారీ వర్షం.. రహదారులు జలమయం, ట్రాఫిక్‌కు బ్రేక్

దేశ రాజధాని దిల్లీ–ఎన్‌సీఆర్‌లో మంగళవారం కురిసిన భారీ వర్షం ప్రజలను తీవ్ర ఇబ్బందులకు గురిచేసింది. ఉదయం నుంచి ఆకాశం మేఘావృతమై ఉండగా, మధ్యాహ్నం సమయంలో పలుచోట్ల మోస్తరు నుంచి భారీ వర్షం కురిసింది. ఐటీవో, జనపథ్‌ రోడ్‌ సహా ప్రధాన ప్రాంతాల్లో నీరు నిలవడంతో వాహనాల రాకపోకలు మందగించాయి.

రోడ్లపై భారీగా నీరు చేరడంతో కార్లు, బస్సులు, ఆటోలు నెమ్మదిగా కదలాల్సి వచ్చింది. పలుచోట్ల ట్రాఫిక్‌ జామ్‌లు ఏర్పడగా, కార్యాలయాలు, విమానాశ్రయానికి వెళ్లే ప్రయాణికులు ఆలస్యాలను ఎదుర్కొన్నారు.

మంగళవారం ఉదయం 8.30 గంటల వరకు సఫ్దర్‌జంగ్‌లో 32.4 మిల్లీమీటర్లు, రిడ్జ్‌లో 37.6 మిల్లీమీటర్లు, లోధీ రోడ్‌లో 36.7 మిల్లీమీటర్ల వర్షపాతం నమోదైంది. ఆయానగర్‌లో 4 మిల్లీమీటర్లు, పాలమ్‌లో 0.8 మిల్లీమీటర్ల వర్షం కురిసింది.

దిల్లీలోని పలు జిల్లాల్లో ఉరుములు, మెరుపులతో కూడిన మోస్తరు నుంచి భారీ వర్షం కురిసే అవకాశం ఉందని భారత వాతావరణ శాఖ తెలిపింది. రహదారులు, లోతట్టు ప్రాంతాల్లో నీరు నిలవడంతో ప్రధాన ట్రాఫిక్‌ అంతరాయం ఏర్పడవచ్చని అధికారిక అంచనాలో పేర్కొంది.

నీటితో నిండిన రోడ్లపై ప్రమాదాల అవకాశాలు పెరుగుతాయని, కనిపించని గుంతలు లేదా తెరిచిన మ్యాన్‌హోల్స్‌ ఉండవచ్చని హెచ్చరించింది. విద్యుత్‌ స్తంభాలు, కిందపడిన తీగలకు దూరంగా ఉండాలని ప్రజలకు సూచించింది.

అత్యవసరం కాని ప్రయాణాలను వాయిదా వేసుకోవాలి. నీటి లోతు తెలియని రహదారుల్లో వాహనాలను నడపకూడదు. ట్రాఫిక్‌ పోలీసులు సూచించిన ప్రత్యామ్నాయ మార్గాలను అనుసరించడంతో పాటు, వాతావరణ శాఖ తాజా హెచ్చరికలను పరిశీలించాలి.