ప్రియాంక గాంధీ పేరుతో ఏఐ ఫేక్ వీడియోలు.. ఆన్‌లైన్ మోసాలపై ప్రజలకు హెచ్చరిక

న్యూఢిల్లీ, సెప్టెంబర్ 10: సోషల్ మీడియాలో ఏఐ ఆధారిత నకిలీ వీడియోల ద్వారా మోసాలకు పాల్పడుతున్న ఘటనలపై కాంగ్రెస్ పార్టీ జనరల్ సెక్రటరీ ప్రియాంక గాంధీ వాద్రా కార్యాలయం ప్రజలను హెచ్చరించింది. ప్రియాంక గాంధీ పేరుతో వైరల్ అవుతున్న ఫేక్ వీడియోలను నమ్మి మోసపోవద్దని సూచించింది.

సైబర్ నేరగాళ్లు ప్రియాంక గాంధీ ముఖం, వాయిస్‌ను కృత్రిమ మేధస్సు (AI) సాయంతో ఉపయోగించి నకిలీ వీడియోలు సృష్టిస్తున్నారని ఆమె కార్యాలయం పేర్కొంది. ముఖ్యంగా వాట్సాప్, ఇన్‌స్టాగ్రామ్ వంటి సోషల్ మీడియా వేదికల్లో పెట్టుబడులకు సంబంధించిన ఫేక్ వీడియోలు ప్రచారం అవుతున్నాయని తెలిపింది.

ఈ వీడియోలను నమ్మి ఎలాంటి పెట్టుబడులు పెట్టవద్దని, అనుమానాస్పద లింకులపై క్లిక్ చేయవద్దని ప్రజలకు విజ్ఞప్తి చేసింది. ప్రముఖుల పేర్లు, ముఖాలు ఉపయోగించి ప్రజలను ఆకర్షించి ఆన్‌లైన్ మోసాలకు పాల్పడే ప్రయత్నాలు జరుగుతున్నాయని హెచ్చరించింది.

సోషల్ మీడియాలో ప్రియాంక గాంధీ పేరుతో అనుమానాస్పద పోస్టులు కనిపిస్తే వెంటనే వాటిని రిపోర్ట్ చేయాలని లేదా బ్లాక్ చేయాలని ఆమె కార్యాలయం కోరింది. పెట్టుబడుల పేరుతో జరిగే ఆన్‌లైన్ మోసాల విషయంలో అప్రమత్తంగా ఉండాలని సూచిస్తూ గురువారం ఉదయం ఇన్‌స్టాగ్రామ్ ఖాతాలో ఓ పోస్టు పెట్టింది.

ఏఐ టెక్నాలజీ అభివృద్ధితో డీప్‌ఫేక్ వీడియోల వినియోగం పెరుగుతున్న నేపథ్యంలో, సోషల్ మీడియాలో వచ్చే సమాచారాన్ని పూర్తిగా నమ్మే ముందు దాని నిజానిజాలను పరిశీలించడం అవసరమని నిపుణులు సూచిస్తున్నారు.