అంతిమ విజయం సత్యానిదే: ప్రధాని మోదీ కీలక వ్యాఖ్యలు

ఇంటర్నెట్ డెస్క్: గుజరాత్‌లోని వడోదరలో ఏర్పాటు చేసిన బహిరంగ సభలో ప్రధాని నరేంద్ర మోదీ కీలక వ్యాఖ్యలు చేశారు. అసత్యాల ప్రతిధ్వనిని సత్యం జయిస్తుందని, అంతిమ విజయం ఎప్పటికీ సత్యానిదేనని అన్నారు. ప్రజలను తప్పుదారి పట్టించేందుకు కొందరు అసత్య ప్రచారాలు చేస్తున్నప్పటికీ, భారత యువత మాత్రం సత్య మార్గంలో ప్రయాణిస్తోందని పేర్కొన్నారు.

వడోదర సభలో యువతను ఉద్దేశించి మాట్లాడిన ప్రధాని.. దేశ అభివృద్ధిలో యువత పాత్ర ఎంతో కీలకమని తెలిపారు. ప్రజలను ప్రభావితం చేసేందుకు తప్పుడు ప్రచారాలు చేసే వారు ఎక్కడైనా కనిపిస్తారని, అయితే నిజాలను ప్రజలు గుర్తిస్తారని అన్నారు.

అంతకుముందు వడోదరలో రూ.20 వేల కోట్ల విలువైన పలు అభివృద్ధి ప్రాజెక్టులను ప్రధాని మోదీ ప్రారంభించారు. ఈ సందర్భంగా అభివృద్ధి కార్యక్రమాలు, మౌలిక వసతుల ప్రాధాన్యతను వివరించారు.

వడోదర-ముంబై మధ్య ప్రారంభించిన డబుల్ డెకర్ గూడ్స్ రైలు గురించి కూడా ప్రధాని ప్రస్తావించారు. ఒక్క ట్రిప్‌లో 250 ట్రక్కులకు సమానమైన సరకు రవాణా చేయగల సామర్థ్యం ఈ రైలుకు ఉందని తెలిపారు. అభివృద్ధి కార్యక్రమాలపై విమర్శలు చేసే వారిపై ఆయన విమర్శలు చేశారు.