ఇరాన్ అధ్యక్షుడితో ప్రధాని మోదీ కీలక భేటీ.. ద్వైపాక్షిక సంబంధాలపై చర్చలు

షాంఘై కో-ఆపరేషన్ ఆర్గనైజేషన్ (SCO) సదస్సు సందర్భంగా భారత ప్రధాని నరేంద్ర మోదీ, ఇరాన్ అధ్యక్షుడు మసౌద్ పెజెష్కియాన్‌తో కీలక ద్వైపాక్షిక సమావేశం నిర్వహించారు. కిర్గిజిస్థాన్ రాజధాని బిష్కెక్‌లో సోమవారం ఈ భేటీ జరిగింది. ఫిబ్రవరిలో ఇరాన్-అమెరికా యుద్ధం ప్రారంభమైన తర్వాత ఇరువురు నేతలు ప్రత్యక్షంగా కలుసుకోవడం ఇదే తొలిసారి అని సమాచారం.

ఈ సమావేశంలో భారత్-ఇరాన్ ద్వైపాక్షిక సంబంధాల తాజా పరిస్థితిని ఇరువురు నేతలు సమీక్షించారు. వాణిజ్యం, వ్యూహాత్మక భాగస్వామ్యం, పరస్పర ఆసక్తి ఉన్న రంగాల్లో సహకారాన్ని మరింత విస్తరించాల్సిన అవసరంపై చర్చించారు. ఇరాన్ విదేశాంగ మంత్రి సయ్యద్ అబ్బాస్ అరాఘ్చీతో పాటు పలువురు ఉన్నతాధికారులు కూడా ఈ భేటీలో పాల్గొన్నారు.

పశ్చిమాసియాలో కొనసాగుతున్న ఉద్రిక్త పరిస్థితులు, హార్ముజ్ జలసంధి మూసివేత, అమెరికా ఆంక్షల నేపథ్యంలో ఈ సమావేశం ప్రాధాన్యం సంతరించుకుంది. ఇరాన్ భారత్‌కు భౌగోళికంగా, వాణిజ్యపరంగా, వ్యూహాత్మకంగా కీలక దేశంగా ఉంది. ఇరువురు నాయకుల చర్చలు భవిష్యత్‌లో రెండు దేశాల మధ్య సహకారాన్ని మరింత బలోపేతం చేసే దిశగా జరిగాయని తెలుస్తోంది.

SCO సదస్సు సందర్భంగా ప్రధాని మోదీ ఇతర దేశాల నేతలతో కూడా సమావేశాలు నిర్వహిస్తున్నారు. అర్మేనియా ప్రధాని నికోల్ పషిన్యాన్‌తో రక్షణ, ఆర్థిక వ్యవహారాలు, ఫార్మా, సైన్స్ అండ్ టెక్నాలజీ, సంస్కృతి, విద్య వంటి రంగాల్లో సహకారంపై చర్చించారు.