బాకరాపేట ఘాట్‌రోడ్డులో లారీ దగ్ధం.. త్రుటిలో తప్పించుకున్న డ్రైవర్

తిరుపతి జిల్లా చంద్రగిరి మండలంలోని బాకరాపేట ఘాట్‌రోడ్డులో సోమవారం తెల్లవారుజామున లారీ ప్రమాదానికి గురై దగ్ధమైంది. మహారాష్ట్రలోని బరంపూర్ నుంచి పైప్‌ల లోడ్‌తో ఓ లారీ తిరుపతి వైపు వెళ్తోంది. మార్గమధ్యంలో బాకరాపేట ఘాట్‌రోడ్డు వద్దకు చేరుకున్న సమయంలో ప్రమాదవశాత్తూ కొండగుట్టను ఢీకొట్టింది. దీంతో లారీ ఇంజిన్‌లో ఒక్కసారిగా మంటలు చెలరేగాయి.

లారీ ఇంజిన్‌లో మంటలు రావడాన్ని గమనించిన డ్రైవర్ అప్రమత్తమయ్యారు. వెంటనే చాకచక్యంగా లారీ నుంచి బయటకు దూకడంతో ప్రాణాపాయం నుంచి త్రుటిలో తప్పించుకున్నారు. కొద్దిసేపటికే మంటలు వేగంగా వ్యాపించడంతో లారీ మొత్తం మంటల్లో చిక్కుకుంది. దీంతో వాహనం పూర్తిగా కాలిపోయింది.

ఈ ప్రమాదాన్ని గమనించిన ఇతర వాహనదారులు వెంటనే అగ్నిమాపక సిబ్బందికి సమాచారం అందించారు. సమాచారం అందుకున్న సిబ్బంది హుటాహుటిన సంఘటనా స్థలానికి చేరుకున్నారు. అగ్నిమాపక సిబ్బంది తీవ్రంగా ప్రయత్నించి లారీలో చెలరేగిన మంటలను అదుపులోకి తీసుకువచ్చారు. అయితే అప్పటికే లారీ పూర్తిగా కాలిపోయింది.

ప్రమాదంలో డ్రైవర్ సకాలంలో స్పందించడంతో ప్రాణాలతో బయటపడటం ఊరట కలిగించింది. ఘటనకు సంబంధించి చంద్రగిరి పోలీసులు కేసు నమోదు చేశారు. ప్రమాదానికి గల కారణాలపై దర్యాప్తు చేపట్టారు. ఘాట్‌రోడ్డులో జరిగిన ఈ ఘటనతో కొంతసేపు వాహనదారులు అప్రమత్తంగా ప్రయాణించారు. ప్రమాదానికి దారితీసిన పరిస్థితులపై పోలీసులు వివరాలు సేకరిస్తున్నారు.