పాలిటెక్నిక్‌ విలీనంపై విద్యార్థుల్లో ఆందోళన.. భవిష్యత్‌పై స్పష్టత కోరుతున్న విద్యార్థులు

తెలంగాణలో ప్రభుత్వ పాలిటెక్నిక్‌ కళాశాలలను స్కిల్‌ హ్యుమన్‌ క్యాపిటల్‌ అండ్‌ నాలెడ్జ్‌ ట్రైనింగ్‌ ఇనిషియేటివ్‌ (శక్తి) పరిధిలోకి విలీనం చేయాలన్న ప్రభుత్వ నిర్ణయంపై విద్యార్థుల్లో ఆందోళన నెలకొంది. ఈ నిర్ణయం తమ భవిష్యత్‌ విద్యా అవకాశాలపై ప్రభావం చూపుతుందని విద్యార్థులు, అధ్యాపకులు అభిప్రాయపడుతున్నారు.

పాలిటెక్నిక్‌ విద్యను పూర్తి చేసిన తర్వాత విద్యార్థులకు ఉద్యోగ అవకాశాలతో పాటు బీటెక్‌ ద్వితీయ సంవత్సరంలో నేరుగా ప్రవేశించే అవకాశం ఉంటుంది. అయితే కొత్త విలీన విధానంతో ఈ అవకాశాలు కొనసాగుతాయా లేదా అన్న దానిపై స్పష్టత లేదని విద్యార్థులు ఆందోళన వ్యక్తం చేస్తున్నారు.

జీవో 97 ప్రకారం పాలిటెక్నిక్‌ కళాశాలలను యంగ్‌ ఇండియా స్కిల్‌ యూనివర్సిటీ పరిధిలోకి తీసుకురావడంపై జిల్లాల్లో నిరసనలు జరుగుతున్నాయి. గ్రామీణ, ఆర్థికంగా వెనుకబడిన విద్యార్థులకు పాలిటెక్నిక్‌ విద్య అందుబాటులో ఉంటుందని, మార్పుల వల్ల అదనపు ఆర్థిక భారం పడే అవకాశం ఉందని వారు చెబుతున్నారు.

విద్యార్థుల భవిష్యత్‌ను దృష్టిలో ఉంచుకుని ప్రభుత్వం నిర్ణయాన్ని పునఃపరిశీలించాలని విద్యార్థి సంఘాలు, అధ్యాపకులు కోరుతున్నారు. విలీన ప్రక్రియపై పూర్తి మార్గదర్శకాలు, విద్యా అవకాశాలపై స్పష్టత ఇవ్వాలని డిమాండ్‌ చేస్తున్నారు.