రెయిన్ అలర్ట్.. తెలంగాణలో 8 జిల్లాలకు వర్ష సూచన

తెలంగాణలో వాతావరణ పరిస్థితుల్లో మార్పులు చోటుచేసుకుంటున్నాయి. రాష్ట్రంలోని పలు జిల్లాల్లో వర్షాలు కురిసే అవకాశం ఉందని వాతావరణ శాఖ అధికారులు హెచ్చరించారు. గురువారం 8 జిల్లాలకు ఎల్లో అలర్ట్ జారీ చేశారు. భద్రాద్రి కొత్తగూడెం, హనుమకొండ, జనగామ, ఖమ్మం, మహబూబాబాద్, మంచిర్యాల, సూర్యాపేట, వరంగల్ జిల్లాల్లో వర్షాలు పడే అవకాశం ఉందని అధికారులు తెలిపారు.

కొన్ని ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉండగా, మరికొన్ని ప్రాంతాల్లో భారీ వర్షాలు నమోదయ్యే అవకాశం ఉందని అంచనా వేశారు. వర్షాలతో పాటు ఈదురుగాలులు కూడా వీచే అవకాశం ఉందని ప్రజలను అప్రమత్తం చేశారు. ముఖ్యంగా పశ్చిమ, ఉత్తర తెలంగాణ ప్రాంతాల్లో అక్కడక్కడా వర్షాలు కురిసే అవకాశం ఉందని వెల్లడించారు.

రాష్ట్రంలో ద్రోణి ప్రభావం కొనసాగుతున్న నేపథ్యంలో ప్రజలు జాగ్రత్తలు తీసుకోవాలని వాతావరణ శాఖ సూచించింది. వర్షాలు, గాలులు ఎక్కువగా ఉన్న సమయంలో చెట్లు, విద్యుత్ స్తంభాల వద్ద ఉండకుండా సురక్షిత ప్రాంతాల్లో ఉండాలని సూచించారు. రైతులు, ప్రయాణికులు వాతావరణ పరిస్థితులను గమనిస్తూ తమ కార్యకలాపాలను కొనసాగించాలని అధికారులు తెలిపారు.