భారత్‌లో ఏఐ అభివృద్ధి చూస్తే సంతోషంగా ఉంది: ఎన్విడియా సీఈఓ జెన్సన్ హువాంగ్

భారత్‌లో ఏఐ వ్యవస్థ అభివృద్ధి చెందుతున్న తీరు చూస్తే సంతోషంగా ఉందని ప్రముఖ మైక్రోప్రాసెసర్ తయారీ సంస్థ ఎన్విడియా సీఈఓ జెన్సన్ హువాంగ్ అన్నారు. ఏఐ రంగంలో ప్రపంచ దేశాలతో పోటీ పడేందుకు భారత్ మరింత వేగం పెంచాల్సిన అవసరం ఉందని ఆయన సూచించారు. బలమైన ఐటీ రంగం ఉన్న భారత్‌కు స్థానికంగా ఏఐ ఆధారిత ఆర్థిక వ్యవస్థను రూపొందించుకునే అవకాశం ఉందని తెలిపారు.

వేగంగా అభివృద్ధి చెందుతున్న ఏఐ రంగంలో ప్రతి దేశం తన స్థానాన్ని బలోపేతం చేసుకోవడానికి ప్రయత్నించాలని హువాంగ్ అభిప్రాయపడ్డారు. ఏఐ ఒక కొత్త సాంకేతిక వేదికగా రూపుదిద్దుకుంటోందని, భవిష్యత్‌లో అనేక రంగాల్లో ఇది కీలక పాత్ర పోషించబోతోందని పేర్కొన్నారు.

భారత్ ఇప్పటికే ఐటీ రంగంలో ముందువరుసలో ఉందని హువాంగ్ చెప్పారు. అయితే ఏఐ రంగంలో కూడా అగ్రస్థానంలో నిలవాలంటే మరింత వేగంగా అడుగులు వేయాల్సిన అవసరం ఉందని స్పష్టం చేశారు. ఏఐ రంగాన్ని అందిపుచ్చుకుంటున్న భారతీయ సంస్థలను చూస్తుంటే తనకు సంతోషంగా ఉందని అన్నారు.

ఇటీవల జెన్సన్ హువాంగ్‌కు ఇన్‌స్టిట్యూట్ ఆఫ్ ఎలక్ట్రికల్ అండ్ ఎలక్ట్రానిక్స్ ఇంజినీర్స్ మెడల్ ఆఫ్ ఆనర్ లభించింది. జీపీయూ రంగం అభివృద్ధిలో ఆయన చేసిన కృషికి గుర్తింపుగా ఈ అవార్డు అందించారు. ఏఐ యుగంలో సాంకేతిక మార్పులు వచ్చినప్పటికీ ఇంజినీరింగ్ ప్రాధాన్యత కొనసాగుతుందని ఆయన పేర్కొన్నారు.