ఏపీ–తెలంగాణ జల వివాదాలపై కీలక భేటీ.. ఢిల్లీలో సీడబ్ల్యూసీ సమావేశం

ఆంధ్రప్రదేశ్, తెలంగాణ రాష్ట్రాల మధ్య కొనసాగుతున్న జల వివాదాల పరిష్కారానికి కేంద్ర జల సంఘం కీలక సమావేశం నిర్వహించింది. ఢిల్లీలోని సీడబ్ల్యూసీ కార్యాలయంలో సోమవారం ఉదయం 10:30 గంటలకు సమావేశం ప్రారంభమైంది. ఇరు తెలుగు రాష్ట్రాలకు సంబంధించిన పలు కీలక జల అంశాలపై అధికారులు చర్చించారు.2026 జనవరిలో ఆంధ్రప్రదేశ్, తెలంగాణ ముఖ్యమంత్రులు, కేంద్ర జలశక్తి మంత్రి, ఉన్నతాధికారుల మధ్య జరిగిన సమావేశానికి కొనసాగింపుగా ఈ భేటీ నిర్వహించినట్లు సమాచారం. రెండు రాష్ట్రాల మధ్య ఉన్న జల వివాదాలకు సంబంధించిన అంశాలను గుర్తించి, తదుపరి చర్చలకు అవసరమైన అజెండాను ఖరారు చేయడం ఈ సమావేశంలో ప్రధాన అంశంగా నిలిచింది.కేంద్ర జల సంఘం చైర్మన్ నేతృత్వంలో జరిగిన ఈ సమావేశానికి ఆంధ్రప్రదేశ్, తెలంగాణ రాష్ట్రాలకు చెందిన అధికారులు హాజరయ్యారు. జనవరి సమావేశం అనంతరం కూడా అజెండా ఖరారు కాకపోవడంతో ఇరు రాష్ట్రాలు తమకు సంబంధించిన అంశాల జాబితాను సమర్పించాలని సీడబ్ల్యూసీ పలుమార్లు లేఖలు రాసినట్లు కథనం పేర్కొంది.అయితే రెండు రాష్ట్రాల నుంచి సరైన స్పందన రాకపోవడంతో సీడబ్ల్యూసీ చైర్మన్ స్వయంగా ఈ సమావేశాన్ని ఏర్పాటు చేశారు. జల వివాదాల్లో ఏ అంశాలకు ప్రాధాన్యం ఇవ్వాలి, వాటిపై తదుపరి చర్చలను ఎలా ముందుకు తీసుకెళ్లాలి అనే దానిపై సమావేశంలో అధికారులు దృష్టి సారించారు. ఈ భేటీ అనంతరం అజెండాపై మరింత స్పష్టత వచ్చే అవకాశం ఉంది.