మిర్యాలగూడలో ట్యాంకర్ బీభత్సం.. అంబులెన్స్‌కు సాయం చేస్తూ వ్యక్తి మృతి

నల్లగొండ జిల్లా మిర్యాలగూడలో జరిగిన రోడ్డు ప్రమాదం విషాదాన్ని మిగిల్చింది. నందిపాడు బైపాస్ వద్ద అద్దంకి-నార్కట్‌పల్లి రహదారిపై వేగంగా దూసుకొచ్చిన ఓ ట్యాంకర్ అదుపుతప్పి బీభత్సం సృష్టించింది. ఈ ప్రమాదంలో కారు, అంబులెన్స్ సహా మొత్తం నాలుగు వాహనాలు ఢీకొన్నాయి.

స్థానికుల వివరాల ప్రకారం, అదే రహదారిపై జరిగిన మరో ప్రమాదంలో ఓ వ్యక్తి తీవ్రంగా గాయపడ్డాడు. సమాచారం అందుకున్న పోలీసులు, అంబులెన్స్ సిబ్బంది వెంటనే అక్కడికి చేరుకున్నారు. బాధితుడిని ఆసుపత్రికి తరలించేందుకు అంబులెన్స్ సిబ్బంది ప్రయత్నిస్తుండగా, వారికి ఓ వ్యక్తి సహాయం చేశాడు. అందరూ కలిసి గాయపడిన వ్యక్తిని అంబులెన్స్‌లోకి ఎక్కించే సమయంలో ఒక్కసారిగా వేగంగా వచ్చిన ట్యాంకర్ అదుపుతప్పి అక్కడున్న వాహనాలను ఢీకొట్టింది.

ఈ ప్రమాదంలో అంబులెన్స్ సిబ్బందికి సహాయం చేస్తున్న వ్యక్తి తీవ్రంగా గాయపడి అక్కడికక్కడే ప్రాణాలు కోల్పోయాడు. స్థానికుల సమాచారంతో పోలీసులు వెంటనే ఘటనాస్థలానికి చేరుకున్నారు. మృతుడిని ఆంధ్రప్రదేశ్‌లోని పొన్నూరుకు చెందిన శ్రీనివాసరావుగా గుర్తించారు. మృతదేహాన్ని పోస్టుమార్టం కోసం స్థానిక ఏరియా ఆసుపత్రికి తరలించారు.

ఈ ఘటనపై మిర్యాలగూడ టూ టౌన్ పోలీసులు కేసు నమోదు చేసి దర్యాప్తు చేపట్టారు. ప్రమాదానికి ట్యాంకర్ డ్రైవర్ అతివేగం, నిర్లక్ష్యం కారణమా లేదా మరేదైనా కారణాలు ఉన్నాయా అనే కోణంలో పోలీసులు వివరాలను సేకరిస్తున్నారు.