హెచ్‌సీయూకు ఐసీఎంఆర్‌ భారీ గ్రాంట్‌.. ఏఐతో పీసీఓఎస్‌ రక్త పరీక్ష అభివృద్ధి

హైదరాబాద్‌ సెంట్రల్‌ యూనివర్సిటీ (హెచ్‌సీయూ) పరిశోధకులకు ప్రతిష్ఠాత్మక ఇండియన్‌ కౌన్సిల్‌ ఆఫ్‌ మెడికల్‌ రీసెర్చ్‌ (ఐసీఎంఆర్‌) నుంచి రూ.4.98 కోట్ల భారీ గ్రాంట్‌ లభించింది. పాలీసిస్టిక్‌ ఓవరీ సిండ్రోమ్‌ (పీసీఓఎస్‌) కోసం ఆర్టిఫిషియల్‌ ఇంటెలిజెన్స్‌ (ఏఐ) ఆధారిత రక్త పరీక్షను అభివృద్ధి చేయడానికి ఈ నిధులను అందించారు.

హెచ్‌సీయూలోని స్కూల్‌ ఆఫ్‌ లైఫ్‌ సైన్సెస్‌ పరిశోధకుల బృందం ఈ ప్రాజెక్ట్‌పై పనిచేయనుంది. పీసీఓఎస్‌ సమస్యను మరింత మెరుగ్గా అర్థం చేసుకోవడానికి దేశంలోనే మొట్టమొదటి సింగిల్‌-సెల్‌ ట్రాన్స్క్రిప్టోమిక్‌ అట్లాస్‌ను నిర్మించడంతో పాటు, తక్కువ ఖర్చుతో నిర్ధారణ చేసే వేదికను రూపొందించాలనే లక్ష్యంతో ఈ పరిశోధన కొనసాగుతోంది.

ఐసీఎంఆర్‌ ఇంటర్మీడియట్‌ ఎక్స్‌ట్రామ్యూరల్‌ గ్రాంట్స్‌-2026 కింద మంజూరైన ఈ నిధులు విశ్వవిద్యాలయానికి ఇటీవల లభించిన అతిపెద్ద పరిశోధన నిధుల్లో ఒకటిగా అధికారులు పేర్కొన్నారు.

ఈ ప్రాజెక్ట్‌ పేరు ‘‘నాన్‌-ఇన్వాసివ్‌ పీసీఓఎస్‌ థెరనోస్టిక్స్‌, మాలిక్యులర్‌ ఎండోటైపింగ్‌, ఎర్లీ డిస్కవరీ కోసం సిస్టమిక్‌-ఫోలిక్యులర్‌ సింగిల్‌-సెల్‌ ట్రాన్స్క్రిప్టోమిక్స్‌ యొక్క మల్టీ-మోడల్‌ ఆర్టిఫిషియల్‌ ఇంటెలిజెన్స్‌ ఇంటిగ్రేషన్‌’’గా పేర్కొన్నారు. అధునాతన జెనోమిక్స్‌, ఏఐ సాంకేతికతలను ఉపయోగించి శస్త్రచికిత్స అవసరం లేని, సరసమైన రక్త పరీక్షను రూపొందించడం ఈ పరిశోధన ప్రధాన ఉద్దేశం.

ఈ ప్రాజెక్ట్‌ ద్వారా పీసీఓఎస్‌ నిర్ధారణ ప్రక్రియను మరింత సులభతరం చేయడంతో పాటు, మహిళల ఆరోగ్య సంరక్షణ రంగంలో కొత్త అవకాశాలు ఏర్పడే అవకాశం ఉందని పరిశోధకులు భావిస్తున్నారు.