రీల్స్ పిచ్చి.. రైల్వే ట్రాక్‌పై ప్రమాదం, యువతి రెండు చేతులు కోల్పోయింది

సోషల్‌ మీడియాలో రీల్స్‌ చేయాలనే సరదా ఓ యువతి జీవితాన్ని విషాదంగా మార్చింది. జార్ఖండ్‌లోని గఢ్వా జిల్లాలో 19 ఏళ్ల పూర్ణిమ కుమారి రైల్వే ట్రాక్‌ సమీపంలో స్నేహితులతో కలిసి వీడియోలు తీస్తుండగా తీవ్ర ప్రమాదానికి గురైంది. రైలు వస్తున్న విషయాన్ని గమనించకపోవడం, రైలు వేగం మరియు తనకు ఉన్న దూరాన్ని సరిగ్గా అంచనా వేయలేకపోవడంతో ఈ ప్రమాదం జరిగినట్లు ప్రాథమిక సమాచారం.

మంగళవారం రైసా ప్రాంతంలోని రైల్వే లైన్‌ వద్ద పూర్ణిమ తన స్నేహితులతో కలిసి రీల్స్‌ చేస్తోంది. అదే సమయంలో రాంచీ వైపు నుంచి రాంచీ-చోపన్ ఎక్స్‌ప్రెస్‌ రైలు వచ్చింది. రైలు ఢీకొట్టడంతో పూర్ణిమకు తీవ్ర గాయాలయ్యాయి. ఈ ప్రమాదంలో ఆమె రెండు చేతులు తెగిపోయాయి. శరీరంలోని ఇతర భాగాలకు కూడా గాయాలు అయినట్లు తెలుస్తోంది.

ప్రమాదం జరిగిన వెంటనే స్నేహితులు ఆమెను గఢ్వా సదర్‌ ఆస్పత్రికి తరలించారు. వైద్యులు అత్యవసర చికిత్స అందించారు. పరిస్థితి విషమంగా ఉండటంతో మెరుగైన వైద్యం కోసం ఉన్నత వైద్య కేంద్రానికి తరలించాలని సూచించారు. విషయం తెలుసుకున్న కుటుంబ సభ్యులు ఆస్పత్రికి చేరుకున్నారు.

ఈ ఘటన మరోసారి సోషల్‌ మీడియా కోసం ప్రమాదకర ప్రదేశాల్లో వీడియోలు తీయడం ఎంత ప్రమాదకరమో గుర్తు చేస్తోంది. ప్రాణాల కంటే కొన్ని క్షణాల వైరల్‌ కంటెంట్‌ ముఖ్యమేమీ కాదని నిపుణులు హెచ్చరిస్తున్నారు.