మరిన్ని వీసాలకు సోషల్ మీడియా వెట్టింగ్ తప్పనిసరి

అమెరికా వలస విధానాల్లో మరో కీలక మార్పు చోటుచేసుకుంది. అధ్యక్షుడు డొనాల్డ్ ట్రంప్ పాలనలో వలసదారులపై కఠిన నియంత్రణలు అమలవుతున్న నేపథ్యంలో, ఇప్పుడు మరిన్ని వీసా కేటగిరీలకు ‘సోషల్ మీడియా వెట్టింగ్’ను తప్పనిసరి చేశారు. అమెరికా విదేశాంగ శాఖ ప్రకటన ప్రకారం, ఈ కొత్త నిబంధనలు మార్చి 30 నుంచి అమల్లోకి రానున్నాయి.

ఇప్పటికే హెచ్-1బీ వంటి ముఖ్య వీసాలకు ఈ విధానం అమలులో ఉండగా, ఇప్పుడు ఏ-3, సీ-3 (డొమెస్టిక్ వర్కర్లు), జీ-5, హెచ్-3, హెచ్-4 (డిపెండెంట్స్), కె, క్యూ, ఆర్, ఎస్, టీ, యూ వంటి అనేక వీసా కేటగిరీలకు కూడా విస్తరించారు. దీంతో వీసా దరఖాస్తు ప్రక్రియ మరింత కఠినంగా మారనుంది.

‘సోషల్ మీడియా వెట్టింగ్’ అనేది వీసా దరఖాస్తుదారుల ఆన్‌లైన్ కార్యకలాపాలను పరిశీలించే ప్రక్రియ. ఇందులో భాగంగా వారి ఫేస్‌బుక్, ట్విట్టర్, ఇన్‌స్టాగ్రామ్ వంటి సామాజిక మాధ్యమ ఖాతాలను అధికారులు తనిఖీ చేస్తారు. వారు ఏ విధమైన కంటెంట్‌ను షేర్ చేస్తున్నారు? వారి అభిప్రాయాలు, సంబంధాలు అమెరికా భద్రతకు ప్రమాదమా? అనే కోణంలో విశ్లేషణ జరుగుతుంది.

ఈ ప్రక్రియలో భాగంగా దరఖాస్తుదారులు తమ సోషల్ మీడియా ఖాతాలను ‘ప్రైవేట్’ నుంచి ‘పబ్లిక్’గా మార్చాల్సి ఉంటుంది. తద్వారా అధికారులు వాటిని సులభంగా పరిశీలించగలుగుతారు. ఒకవేళ అనుమానాస్పద కంటెంట్ లేదా అనుచిత కార్యకలాపాలు కనిపిస్తే, వీసా తిరస్కరణకు కూడా దారితీయవచ్చు.

జాతీయ భద్రతను దృష్టిలో ఉంచుకుని అమెరికా ప్రభుత్వం గత సంవత్సరం నుంచే ఈ విధానాన్ని అమలు చేస్తోంది. గత డిసెంబర్ నుంచి హెచ్-1బీ, హెచ్-4, ఎఫ్, ఎం, జే వీసాలకు దరఖాస్తు చేసుకునేవారి సోషల్ మీడియా యాక్టివిటీని క్షుణ్ణంగా పరిశీలిస్తున్నారు. ఇప్పుడు ఈ పరిధిని మరింత విస్తరించడం ద్వారా వలస నియంత్రణను మరింత కఠినతరం చేస్తున్నారు.

ఈ నిర్ణయం వలసదారులపై ప్రభావం చూపే అవకాశం ఉంది. ముఖ్యంగా విద్యార్థులు, ఉద్యోగార్థులు తమ ఆన్‌లైన్ ప్రవర్తనపై మరింత జాగ్రత్తగా ఉండాల్సిన అవసరం ఏర్పడింది. సోషల్ మీడియాలో చేసిన పోస్టులు, కామెంట్లు కూడా వీసా నిర్ణయంపై ప్రభావం చూపవచ్చని నిపుణులు సూచిస్తున్నారు.