కాకినాడ, నవంబర్ 3: కాకినాడ జిల్లా గొల్లప్రోలు మున్సిపల్ ఎన్నికల ఓట్ల లెక్కింపులో కూటమి అభ్యర్థులు ఆధిక్యం ప్రదర్శించారు. మొత్తం 23 వార్డులకు గాను తొలి రౌండ్‌లో ఆరు వార్డుల ఫలితాలు వెల్లడయ్యాయి. వీటిలో తెలుగుదేశం పార్టీ మూడు స్థానాల్లో, జనసేన ఒక స్థానంలో విజయం సాధించాయి. మిగిలిన రెండు వార్డుల్లో స్వతంత్ర అభ్యర్థులు గెలుపొందారు.
మొదటి వార్డులో జనసేన అభ్యర్థి వెన్నా ముత్యాలమ్మ వైసీపీ అభ్యర్థిపై 432 ఓట్ల మెజారిటీతో విజయం సాధించారు. ఐదో వార్డులో టీడీపీ అభ్యర్థి మురదా నవీన్ వైసీపీ ప్రత్యర్థిపై 89 ఓట్ల ఆధిక్యంతో గెలుపొందారు. తొమ్మిదో వార్డులో టీడీపీ అభ్యర్థి సింగం ప్రవీణ్ మణి వైసీపీ అభ్యర్థిపై 262 ఓట్ల మెజారిటీ సాధించారు.
13వ వార్డులో స్వతంత్ర అభ్యర్థి వీర్ల అరుణ బీజేపీ అభ్యర్థిపై 459 ఓట్ల మెజారిటీతో విజయం సాధించారు. 17వ వార్డులో జనసేన రెబల్‌గా పోటీ చేసిన స్వతంత్ర అభ్యర్థి గున్నాబత్తుల రాంబాబు జనసేన ప్రత్యర్థిపై 345 ఓట్ల మెజారిటీతో గెలిచారు.
21వ వార్డులో టీడీపీ అభ్యర్థి పర్వత సూర్యనారాయణ వైసీపీ అభ్యర్థిపై 515 ఓట్ల మెజారిటీతో విజయకేతనం ఎగురవేశారు.
తొలి రౌండ్ ఫలితాల్లో కూటమి నాలుగు వార్డులను కైవసం చేసుకోవడం రాజకీయంగా ప్రాధాన్యం సంతరించుకుంది. స్వతంత్ర అభ్యర్థులు రెండు స్థానాల్లో గెలవడం కూడా ఆసక్తికరంగా మారింది. ముఖ్యంగా జనసేన రెబల్ అభ్యర్థి విజయం స్థానిక రాజకీయాల్లో చర్చనీయాంశమైంది.
ఇంకా 17 వార్డుల ఫలితాలు వెలువడాల్సి ఉండటంతో రెండో రౌండ్ లెక్కింపుపై ఉత్కంఠ నెలకొంది. మొత్తం ఫలితాల్లో ఏ పార్టీ పైచేయి సాధిస్తుందనేది ఆసక్తికరంగా మారింది. అభ్యర్థులు, పార్టీ నాయకులు తదుపరి ఫలితాల కోసం ఎదురుచూస్తున్నారు. తొలి రౌండ్‌లో కూటమి ఆధిక్యం స్పష్టంగా కనిపించినప్పటికీ పూర్తిస్థాయి ఫలితాల తర్వాతే తుది చిత్రం వెల్లడికానుంది.
కాకినాడ జిల్లాలో కూటమి జోరు.. గొల్లప్రోలులో తొలి రౌండ్‌లోనే 4 వార్డులు కైవసం, టీడీపీదే పైచేయి!
17
Published: 📅
Reported by: 🖊
Banu Prakash
