RAW NTRతో మాకు సంబంధం లేదు.. అధికారిక ప్రకటన విడుదల చేసిన ఎన్టీఆర్ టీమ్

ఎన్టీఆర్ పేరుతో ప్రచారం జరుగుతున్న RAW NTR సంస్థపై ఆయన కార్యాలయం అధికారిక ప్రకటన విడుదల చేసింది. ఆ సంస్థతో తమకు ఎలాంటి సంబంధం లేదని స్పష్టం చేస్తూ, అభిమానులు అధికారిక సమాచారం విషయంలో అప్రమత్తంగా ఉండాలని కోరింది.

ప్రకటనలో "RAW NTR" పేరుతో నిర్వహిస్తున్న కార్యకలాపాలు తమ దృష్టికి వచ్చాయని పేర్కొంది. అయితే ఆ సంస్థకు ఎన్టీఆర్ తరఫున ప్రాతినిధ్యం వహించే హక్కు లేదని స్పష్టం చేసింది.

సేవా కార్యక్రమాలు, ప్రజా సంక్షేమ కార్యక్రమాలు, సామాజిక సేవలకు సంబంధించిన ప్రకటనలు కేవలం ఎన్టీఆర్ లేదా ఆయన అధికారిక బృందం నుంచే విడుదల అవుతాయని తెలిపింది.

అనధికారిక వ్యక్తులు లేదా సంస్థలు చేస్తున్న ప్రచారాన్ని నమ్మవద్దని అభిమానులకు విజ్ఞప్తి చేసింది. సోషల్ మీడియా, డిజిటల్ వేదికల్లో వస్తున్న ధ్రువీకరణ లేని సమాచారాన్ని షేర్ చేయకుండా అధికారిక ప్రకటనలకే ప్రాధాన్యం ఇవ్వాలని సూచించింది.

ఇటీవల సోషల్ మీడియాలో RAW NTR పేరుతో పలు కార్యక్రమాలు ప్రచారంలోకి రావడంతో ఈ వివరణ ఇచ్చినట్లు తెలుస్తోంది. ఈ ప్రకటనతో అభిమానుల్లో నెలకొన్న సందిగ్ధత తొలగుతుందని భావిస్తున్నారు.

ఇదిలా ఉండగా ఎన్టీఆర్ ప్రస్తుతం ప్రశాంత్ నీల్ దర్శకత్వంలో రూపొందుతున్న 'డ్రాగన్' చిత్రంలో నటిస్తున్నారు. ఈ సినిమా వచ్చే ఏడాది జూన్ 11న విడుదల కానుంది. అనంతరం త్రివిక్రమ్ దర్శకత్వంలో మరో భారీ ప్రాజెక్ట్ ప్రారంభం కానుంది. దీనికి సంబంధించిన పూర్తి వివరాలను చిత్రబృందం త్వరలో వెల్లడించే అవకాశం ఉంది.