లెనిన్ మూవీ రివ్యూ.. అఖిల్‌కు మాస్ పాత్రలో కొత్త మలుపు

అఖిల్ అక్కినేని లెనిన్‌తో తన నటనలో కొత్త కోణాన్ని చూపించే ప్రయత్నం చేశారు. ఇప్పటివరకు ఎక్కువగా అర్బన్ కథల్లో కనిపించిన ఆయన, ఈసారి చిత్తూరు జిల్లా పల్లెటూరి నేపథ్యంలో సాగే యాక్షన్ డ్రామాలో నటించారు.

కథ శ్రీరామాపురం గ్రామం చుట్టూ తిరుగుతుంది. అనాథ అయిన లెనిన్‌ను ఓ పెద్దింటి మహిళ ఆదరిస్తుంది. ఆమె కొడుకు వసంత్‌తో లెనిన్‌కు గాఢమైన స్నేహం ఏర్పడుతుంది. లెనిన్ ఊరిలో జరిగే భార‌తం మెట్ట ఉత్సవాల బాధ్యతలు చూసుకుంటూ గ్రామంలో అందరికీ దగ్గరవుతాడు.

లెనిన్ భార‌తిని ప్రేమిస్తాడు. వసంత్ స్వయంగా వారి పెళ్లి జరిపిస్తాడు. కానీ ఉత్సవాల చివరి రోజు జరిగిన అనూహ్య సంఘటన లెనిన్ జీవితాన్ని తలకిందులు చేస్తుంది. అతను జైలుకు వెళ్లాల్సి వస్తుంది. తర్వాత జరిగేది కథలోని ప్రధాన సంఘర్షణ.

సినిమా ప్రారంభం ఆసక్తికరంగా ఉంటుంది. ఎన్టీఆర్ వాయిస్ ఓవర్, భార‌తం మెట్ట ఉత్సవాల పరిచయం, జైలు నుంచి హీరో బయటకు వచ్చే సన్నివేశాలు కథకు మంచి సెటప్ ఇస్తాయి. అయితే మొదటి భాగంలో కొన్ని సన్నివేశాలు పాత కమర్షియల్ ఫార్మాట్‌ను గుర్తు చేస్తాయి.

ఇంటర్వెల్‌కు ముందు నుంచి కథ గాడిలో పడుతుంది. ద్వితీయార్ధంలో పాత్రల రంగులు మారడం, వసంత్ ట్రాక్, పెద్దమ్మ నిర్ణయం, చివరి వరకూ వచ్చే ట్విస్ట్‌లు కథను ఆసక్తికరంగా మార్చుతాయి. మొదటి భాగంలో కనిపించిన లోపాలను రెండో భాగం చాలావరకు కప్పేస్తుంది.

అఖిల్ లెనిన్ పాత్రలో ఆకట్టుకున్నారు. ఆయన మాస్ ఆహార్యం, యాక్షన్, భావోద్వేగ నటన సినిమాకు బలం. క్లైమాక్స్‌లో ఆయన నటన ప్రత్యేకంగా నిలుస్తుంది. భాగ్యశ్రీ బోర్సే సరిపోయే పాత్రలో కనిపించినా, ఆమె పాత్రకు మరింత లోతు ఉండి ఉంటే ప్రేమకథ బలపడేది.

ఈశ్వరీరావు, ప్రమోద్ పంజు సినిమాకు పెద్ద ప్లస్. ముఖ్యంగా ప్రమోద్ పంజు పాత్ర కొన్ని చోట్ల కథను బలంగా మోస్తుంది. శివాజీ, బ్రహ్మాజీ, రాంకీ, సునీల్, గెటప్ శ్రీను తమ పాత్రల పరిధిలో మెప్పించారు.

సాంకేతికంగా సినిమా మెరుగ్గా ఉంది. కెమెరా వర్క్, ప్రొడక్షన్ డిజైన్, గ్రామీణ ఉత్సవాల రూపకల్పన బాగున్నాయి. థమన్ నేపథ్య సంగీతం సన్నివేశాలకు బలం ఇచ్చింది. పాటలు కథ వాతావరణానికి సరిపోయేలా ఉన్నాయి.

మొత్తంగా, లెనిన్ పూర్తి స్థాయి కొత్త కథ కాకపోయినా, అఖిల్ మాస్ ప్రయత్నం, రెండో భాగం మలుపులు, గ్రామీణ నేపథ్యం కోసం చూడదగిన సినిమా.