విజయ్‌కు ప్రభుత్వం ఏర్పాటుకు గవర్నర్ నిరాకరణ

తమిళనాడు రాజకీయాల్లో విజయ్ ముందున్న మెజారిటీ పరీక్ష మరింత కఠినంగా మారింది. టీవీకే అతిపెద్ద పార్టీగా నిలిచినప్పటికీ ప్రభుత్వం ఏర్పాటు చేయడానికి కావాల్సిన పూర్తి సంఖ్యాబలం చూపించలేకపోవడంతో గవర్నర్ అనుమతి నిరాకరించినట్లు సమాచారం. దీంతో తక్షణం విజయ్ ప్రభుత్వం ఏర్పాటుపై ఉత్కంఠ కొనసాగుతోంది.

ప్రభుత్వం ఏర్పాటు చేయడానికి 118 మంది ఎమ్మెల్యేల మద్దతు అవసరం. టీవీకే వద్ద 108 స్థానాలు ఉన్నప్పటికీ విజయ్ రెండు స్థానాల్లో గెలవడంతో ఒక స్థానాన్ని వదులుకోవాల్సి ఉంటుంది. దీంతో పార్టీ వాస్తవ బలం 107కు తగ్గుతుంది. కాంగ్రెస్ మద్దతు కలిపితే లెక్క 112కు చేరుతుంది. అయినప్పటికీ మెజారిటీకి ఇంకా 6 మంది ఎమ్మెల్యేల మద్దతు అవసరం.

విజయ్ బుధవారం మధ్యాహ్నం రాజ్ భవన్‌లో గవర్నర్‌ను కలిసి ప్రభుత్వం ఏర్పాటు అవకాశాలపై వివరించినట్లు తెలుస్తోంది. కాంగ్రెస్ మద్దతు ఉందని, మరికొన్ని పార్టీలు కూడా మద్దతు ఇవ్వవచ్చని ఆయన చెప్పినట్లు సమాచారం. ముఖ్యమంత్రిగా ప్రమాణం చేసిన తర్వాత సభలో బలపరీక్షను ఎదుర్కొంటానని వివరించినా గవర్నర్ సంతృప్తి చెందలేదని నివేదికలు చెబుతున్నాయి.

ఇప్పుడు చిన్న పార్టీలు కీలకంగా మారాయి. పీఎంకే, సీపీఐ, సీపీఎం, ఐయూఎంఎల్, డీఎండీకే వంటి పార్టీల నిర్ణయంపై ప్రభుత్వం ఏర్పాటుకు దారి ఆధారపడుతోంది. ఏఐడీఎంకేలోని ఒక వర్గం కూడా టీవీకే వైపు మొగ్గు చూపుతోందన్న చర్చ ఉంది. అయితే అధికారిక మద్దతు లేఖలు లేకుండా లెక్కలు సరిపోవు.

విజయ్‌కు ప్రజాదరణ పెద్ద బలం. కానీ ప్రభుత్వం ఏర్పాటు చేయడంలో అభిమానుల మద్దతు కాదు, సభలో సంఖ్యాబలం ముఖ్యం. ఈ దశలో ఒక్కో ఎమ్మెల్యే మద్దతు కూడా తమిళనాడు రాజకీయ దిశను మార్చే స్థాయికి చేరింది.