కేరళలోని కోచి నగరంలో ఓ వైద్యుడిని అత్యవసర చికిత్స పేరుతో అపార్ట్‌మెంట్‌కు పిలిపించి దాడి చేసిన ఘటన సంచలనం సృష్టించింది. ఈ ఘటనలో డాక్టర్‌కు చెందిన విలువైన వస్తువులను దోచుకున్నట్లు ఆరోపణలు రావడంతో పోలీసులు కేసు నమోదు చేశారు. ఇద్దరు సినీ నటులు సహా ముగ్గురిని అరెస్టు చేసినట్లు వార్తలు వెల్లడించాయి.
నవంబర్ 2న జరిగిన ఈ ఘటన ఆలస్యంగా వెలుగులోకి వచ్చింది. పోలీసుల కథనం ప్రకారం.. నటి అతుల్య చంద్ర, నటుడు, నిర్మాత బిబిన్ పెరుంబిలి, మరికొందరు వ్యక్తులు ఓ వైద్యుడికి ఫోన్ చేశారు. తమకు తెలిసిన వ్యక్తి తీవ్ర అనారోగ్యంతో ఉన్నారని, వెంటనే వైద్య సహాయం అవసరమని చెప్పి అపార్ట్‌మెంట్‌కు రావాలని కోరారు.
అత్యవసర పరిస్థితి అని భావించిన డాక్టర్ కొద్దిసేపటికే సూచించిన ఫ్లాట్‌కు చేరుకున్నారు. అయితే అప్పటికే అక్కడ సుమారు 12 మంది ఉన్నట్లు సమాచారం. వైద్యుడు లోపలికి వెళ్లిన తర్వాత బిబిన్ పెరుంబిలి, ఇతరులు కలిసి ఆయనపై దాడి చేసినట్లు పోలీసులు తెలిపారు.
నిందితులు వైద్యుడిని కుర్చీలో కూర్చోబెట్టి కడుపు, పక్కటెముకలపై కొట్టినట్లు ఫిర్యాదులో పేర్కొన్నారు. ఈ సమయంలో అతుల్య చంద్ర వైద్యుడికి చెందిన మొబైల్ ఫోన్, స్మార్ట్‌వాచ్, వైర్‌లెస్ ఇయర్‌ఫోన్లను తీసుకున్నట్లు ఆరోపణలు ఉన్నాయి.
అంతేకాకుండా వైద్యుడిని దొంగగా ఆరోపిస్తూ చంపేస్తామని బెదిరించినట్లు సమాచారం. తమ బంధువుల్లో ఒకరిపై లైంగిక దాడికి పాల్పడ్డావని ఆరోపిస్తూ వైద్యుడిని నిలదీసినట్లు కథనం వెల్లడించింది. అయితే ఈ ఆరోపణల నిజానిజాలపై అధికారిక స్పష్టత లేదు.
దాడి అనంతరం బాధిత వైద్యుడు ఎలాగోలా అక్కడి నుంచి తప్పించుకుని పోలీసులను ఆశ్రయించారు. జరిగిన ఘటనను వివరించి ఫిర్యాదు చేయడంతో పోలీసులు కేసు నమోదు చేసి దర్యాప్తు ప్రారంభించారు.
ఘటనకు సంబంధించిన పూర్తి వివరాలు, ఇతరుల పాత్ర, దాడి వెనుక అసలు కారణాలపై దర్యాప్తు పూర్తయిన తర్వాత స్పష్టత వచ్చే అవకాశం ఉంది.
ఎమర్జెన్సీ పేరుతో డాక్టర్‌కు వల.. ఇంటికి పిలిచి దాడి, రూ.3.5 లక్షల విలువైన వస్తువుల దోపిడీ.. ఇద్దరు నటుల అరెస్ట్!
4
Published: 📅
Reported by: 🖊
Kanakadri
