అమృత్‌సర్ ఎయిర్‌పోర్టు సమీపంలో డ్రోన్ల కలకలం.. గగనతలం తాత్కాలికంగా మూసివేత

పంజాబ్‌లోని అమృత్‌సర్ అంతర్జాతీయ విమానాశ్రయం సమీపంలో డ్రోన్ల సంచారం కలకలం రేపింది. ఆదివారం రాత్రి సుమారు 9:40 గంటల సమయంలో విమానాశ్రయ పరిసరాల్లో 2 నుంచి 3 డ్రోన్లు ఎగురుతున్నట్లు అధికారులు గుర్తించారు. భద్రతా కారణాల దృష్ట్యా ముందుజాగ్రత్త చర్యగా రాత్రి 9:50 గంటలకు విమానాశ్రయ గగనతలాన్ని తాత్కాలికంగా మూసివేశారు.

గగనతలం మూసివేయడంతో పలు విమానాల రాకపోకలకు అంతరాయం ఏర్పడింది. ఢిల్లీ నుంచి అమృత్‌సర్‌కు వచ్చిన ఎయిర్ ఇండియా ఏఐ-855 విమానానికి ల్యాండింగ్ అనుమతి లభించకపోవడంతో దానిని తిరిగి ఢిల్లీకి పంపించారు.

అలాగే ముంబై నుంచి అమృత్‌సర్‌కు రావాల్సిన ఇండిగో 6ఈ-5028 విమానాన్ని చండీగఢ్‌కు మళ్లించారు. కౌలాలంపూర్ నుంచి అమృత్‌సర్‌కు వస్తున్న మలేషియా ఎయిర్‌లైన్స్ ఎమ్‌హెచ్-118 అంతర్జాతీయ విమానాన్ని కూడా ఢిల్లీకి తరలించారు.

ఈ ఆకస్మిక పరిణామంతో ప్రయాణికులు ఇబ్బందులు ఎదుర్కొన్నారు. విమానాల మళ్లింపు, ల్యాండింగ్‌లో ఆలస్యం కారణంగా ప్రయాణ ప్రణాళికల్లో మార్పులు చోటుచేసుకున్నాయి.

విమానాశ్రయం వంటి అత్యంత సున్నితమైన ప్రాంతానికి సమీపంలో డ్రోన్లు కనిపించడం భద్రతాపరంగా కీలక అంశంగా మారింది. డ్రోన్లు ఎవరివి, ఎందుకు ఆ ప్రాంతంలో సంచరించాయి అనే వివరాలపై సంబంధిత అధికారులు విచారణ చేపట్టే అవకాశం ఉంది. భద్రతా పరిస్థితిని సమీక్షించిన తర్వాత విమాన రాకపోకలను సాధారణ స్థితికి తీసుకువచ్చే చర్యలు చేపట్టనున్నారు.