అనకాపల్లిలో ఘోర రోడ్డు ప్రమాదం.. భార్యాభర్తలు మృతి
📅 05-10-2026
అనకాపల్లి జిల్లాలో విషాదకర ఘటన చోటుచేసుకుంది. ఎలమంచిలి మండలం పులపర్తి జంక్షన్ సమీపంలోని జాతీయ రహదారిపై సోమవారం తెల్లవారుజామున ఘోర రోడ్డు ప్రమాదం జరిగింది. సైకిల్‌పై వెళ్తున్న భార్యాభర్తలను గుర్తుతెలియని వాహనం ఢీకొట్టింది. ఈ ప్రమాదంలో పులపర్తి గ్రామానికి చెందిన పాపారావు, అమ్మాజీ అక్కడికక్కడే మృతి చెందారు. సమాచారం అందుకున్న పోలీసులు ఘటనాస్థలికి చేరుకుని మృతదేహాలను స్వాధీనం చేసుకున్నారు. అనంతరం అనకాపల్లి ప్రభుత్వాసుపత్రికి పోస్టుమార్టం కోసం తరలించారు. ప్రమాదానికి కారణమైన వాహనం కోసం పోలీసులు దర్యాప్తు చేస్తున్నారు. సమీపంలోని సీసీటీవీ కెమెరాల ఫుటేజీని పరిశీలిస్తున్నారు.
