తీస్తా నదిలో గున్న ఏనుగు రక్షణ.. మత్స్యకారుల సాహసం దేశవ్యాప్తంగా ప్రశంసలు

పశ్చిమ బెంగాల్‌లోని జల్‌పాయ్‌గురి జిల్లా గజోల్‌డోబా సమీపంలో జరిగిన గున్న ఏనుగు రక్షణ ఘటన దేశవ్యాప్తంగా అందరి దృష్టిని ఆకర్షించింది. తీస్తా నదిని దాటుతున్న ఏనుగుల గుంపు నుంచి కేవలం 3-4 రోజుల వయసున్న ఏనుగు పిల్ల విడిపోయి, ప్రవాహ ఉద్ధృతికి కొట్టుకుపోయింది. నీటిలో దాదాపు మునిగిపోతూ తొండం మాత్రమే కనిపిస్తున్న ఆ గున్నను నదిలో చేపలు పడుతున్న స్థానిక మత్స్యకారులు గమనించారు. ఒక్క క్షణం ఆలస్యం చేయకుండా దాన్ని రక్షించేందుకు రంగంలోకి దిగారు.

తమ ప్రాణాలకు ముప్పు ఉన్నప్పటికీ ఐదుగురు మత్స్యకారులు రెండు పడవల్లో దాదాపు 3 కిలోమీటర్ల దూరం ఆ ఏనుగు పిల్లను వెంబడించారు. బలమైన ప్రవాహానికి ఎదురీదుతూ దాని వద్దకు చేరుకుని, బాగా అలసిపోయిన గున్నను జాగ్రత్తగా పడవలోకి ఎక్కించారు. ఆ తర్వాత ఒడ్డుకు తీసుకొచ్చి సురక్షితంగా బయటకు దించారు.

ఈ సమాచారం అందుకున్న అటవీశాఖ సిబ్బంది గున్నను తమ సంరక్షణలోకి తీసుకుని పశువైద్య సేవలు అందించారు. అనంతరం తల్లి ఏనుగును గుర్తించి, తల్లీబిడ్డలను మళ్లీ కలిపే ప్రయత్నం చేశారు. చివరకు తన పిల్లను చూసిన తల్లి ఏనుగు పరుగెత్తుకుంటూ వచ్చి దాన్ని స్వీకరించడం ఈ ఘటనలో అత్యంత భావోద్వేగ క్షణంగా నిలిచింది. స్థానిక సమాజం, అటవీశాఖ సమన్వయంతో జరిగిన ఈ రక్షణ చర్య నిజంగా స్ఫూర్తిదాయకం.