అరసవల్లి ఆలయ అభివృద్ధికి రూ.55.74 కోట్లు.. రెండేళ్లలో ప్రాజెక్ట్ పూర్తి: రామ్మోహన్ నాయుడు

శ్రీకాకుళం జిల్లాలోని ప్రముఖ అరసవల్లి శ్రీ సూర్యనారాయణ స్వామి ఆలయ అభివృద్ధికి కేంద్ర ప్రభుత్వం రూ.55.74 కోట్లు కేటాయించిందని కేంద్ర మంత్రి రామ్మోహన్ నాయుడు తెలిపారు. సోమవారం అరసవల్లి ఆలయాన్ని సందర్శించిన ఆయన ఇంద్ర పుష్కరిణిని పరిశీలించారు. అనంతరం ఆలయ అధికారులు, అర్చకులతో అభివృద్ధి పనులపై సమీక్ష నిర్వహించారు.

స్వదేశీ దర్శనం 2.0 కింద ఈ నిధులు కేటాయించడం సంతోషకరమైన విషయమని రామ్మోహన్ నాయుడు అన్నారు. కేంద్ర ప్రభుత్వం, కేంద్ర పర్యాటక మంత్రి గజేంద్ర సింగ్ షెరావత్‌కు శ్రీకాకుళం జిల్లా ప్రజల తరఫున కృతజ్ఞతలు తెలిపారు. ప్రధాని మోదీ, ముఖ్యమంత్రి చంద్రబాబు నాయుడు, డిప్యూటీ సీఎం పవన్ కల్యాణ్ సహకారంతో గత రెండేళ్లుగా అరసవల్లి క్షేత్ర అభివృద్ధికి చేస్తున్న ప్రయత్నాలకు ఈ నిధుల కేటాయింపు ఒక మైలురాయిగా నిలుస్తుందని పేర్కొన్నారు.

స్వదేశీ దర్శనం ప్రాజెక్ట్‌ను పూర్తిస్థాయిలో వినియోగించుకుని రెండేళ్లలోపే పనులు పూర్తి చేయాలని లక్ష్యంగా పెట్టుకున్నామని తెలిపారు. అరసవల్లి ఆలయానికి దేశ, విదేశాల నుంచి భక్తుల రాక పెరుగుతోందని, ప్రతి ఆదివారం సుమారు 30 వేల మంది భక్తులు దర్శనానికి వస్తున్నారని చెప్పారు. భవిష్యత్తులో భక్తుల సంఖ్య మరింత పెరిగే అవకాశం ఉన్నందున అవసరమైన సౌకర్యాలు కల్పించేలా ప్రణాళికలు రూపొందిస్తున్నామని వెల్లడించారు.

ఇప్పటికే ఇంద్ర పుష్కరిణి అభివృద్ధికి రూ.4 కోట్లతో పనులు జరుగుతున్నాయని తెలిపారు. అరసవల్లి ఆలయాన్ని రాష్ట్రంలో ప్రతిష్ఠాత్మకమైన ఆలయంగా అభివృద్ధి చేయాలనే లక్ష్యంతో ప్రభుత్వం పనిచేస్తోందని, స్థానిక ప్రజలు కూడా అభివృద్ధి కార్యక్రమాలకు సహకరించాలని రామ్మోహన్ నాయుడు కోరారు.