ఏపీ స్థానిక ఎన్నికలు.. మూడు పార్టీలకు ఉమ్మడి గుర్తులు కేటాయించిన ఎస్‌ఈసీ

ఆంధ్రప్రదేశ్‌లో జరగనున్న రెండవ సాధారణ పట్టణ,గ్రామీణ స్థానిక సంస్థల ఎన్నికలకు సంబంధించి మూడు రిజిస్టర్డ్ రాజకీయ పార్టీలకు రాష్ట్ర ఎన్నికల సంఘం ఉమ్మడి గుర్తులను కేటాయించింది. జాతీయ సమ సమాజం పార్టీ అభ్యర్థులకు బ్యాట్ గుర్తును, భారత చైతన్య యువజన పార్టీకి బ్యాటరీ టార్చ్ గుర్తును,రాష్ట్రీయ ప్రజా కాంగ్రెస్ సెక్యులర్ పార్టీకి గ్యాస్ సిలిండర్ గుర్తును కేటాయిస్తూ ఏపీ ఎస్‌ఈసీ నిర్ణయం తీసుకుంది.

ఉమ్మడి గుర్తులు పొందిన ఈ మూడు పార్టీలు స్థానిక సంస్థల ఎన్నికల్లో కనీసం 10 శాతం స్థానాల్లో తమ అభ్యర్థులను పోటీకి దించాల్సి ఉంటుంది.ఈసదుపాయం కోసం ఒక్కో పార్టీ రాష్ట్ర ఎన్నికల సంఘానికి రూ.1లక్ష చొప్పున డిపాజిట్ చెల్లించింది. నిర్ణయించిన కనీసం 10 శాతం స్థానాల్లో అభ్యర్థులను నిలబెట్టకపోతే ఆయా పార్టీల డిపాజిట్ మొత్తాన్నిఎన్నికల సంఘం జప్తు చేస్తుందని స్పష్టం చేసింది.

అక్టోబర్ 19,2026న నోటిఫికేషన్ విడుదల కానున్న ఎంపీటీసీ,జెడ్పీటీసీ ఎన్నికల్లో కూడా ఈ పార్టీలకు ఇవే ఉమ్మడి గుర్తులు వర్తించనున్నాయి.అయితే ఈ గుర్తుల కేటాయింపు శాశ్వతం కాదని,కేవలం ఒక్కసారి మాత్రమే వర్తించే ప్రత్యేక సదుపాయమని రాష్ట్ర ఎన్నికల సంఘం పేర్కొంది.

స్థానిక సంస్థల ఎన్నికల్లో ఓటర్లకు పార్టీ అభ్యర్థులను సులభంగా గుర్తించేందుకు ఉమ్మడి గుర్తులు ఉపయోగపడనున్నాయి.ఎన్నికల సంఘం విధించిన నిబంధనలకు అనుగుణంగా అభ్యర్థులను బరిలోకి దింపడం ఆయా పార్టీలకు కీలకంగా మారనుంది.ఎన్నిక ప్రక్రియ ప్రారంభమయ్యే ముందు ఈ గుర్తుల కేటాయింపుతో మూడు పార్టీలకు తమ అభ్యర్థుల ప్రచారంలో ఒకే గుర్తును వినియోగించే అవకాశం లభించింది.

రాష్ట్ర ఎన్నికల సంఘం ప్రకటన ప్రకారం ఉమ్మడి గుర్తు పొందిన పార్టీలు ఎన్నికల నియమాలను పాటించాలి.గుర్తు పొందడం కాకుండా నిర్దేశించిన స్థాయిలో పోటీ చేయడం అవసరం.ఈ నిబంధన అమలును ఎస్‌ఈసీ పర్యవేక్షించనుంది. మూడు పార్టీలకు గుర్తులు కేటాయించిన నేపథ్యంలో స్థానిక ఎన్నికల ఏర్పాట్లు వేగం పుంజుకున్నాయి.అభ్యర్థుల ఎంపిక, నామినేషన్లు, ప్రచార వ్యూహాలపై ఆయా పార్టీలు దృష్టి సారించే అవకాశం ఉంది.నోటిఫికేషన్ విడుదలతో ఎన్నికల ప్రక్రియ తదుపరి దశలోకి ప్రవేశించనుంది.