కొంకణ్‌లో భారీ వర్షాలు, మహారాష్ట్ర–గోవా తీరానికి గాలుల హెచ్చరిక

నైరుతి రుతుపవనాలు మహారాష్ట్రలో మరింత ముందుకు సాగాయని భారత వాతావరణ శాఖ సోమవారం వెల్లడించింది. మధ్య అరేబియా సముద్రం, మహారాష్ట్ర, తెలంగాణలోని మరిన్ని ప్రాంతాలకు రుతుపవనాలు విస్తరించగా, కర్ణాటక మొత్తం వాటి పరిధిలోకి వచ్చినట్లు తెలిపింది. ఛత్తీస్‌గఢ్‌, ఒడిశా, ఝార్ఖండ్‌, బిహార్‌లోని కొన్ని ప్రాంతాలకు కూడా రుతుపవనాలు చేరాయని పేర్కొంది.

రాబోయే 48 గంటల్లో మధ్య అరేబియా సముద్రంలోని మిగిలిన ప్రాంతాలు, ముంబయితో పాటు మహారాష్ట్రలోని మరిన్ని భాగాలు, తెలంగాణ, ఒడిశా మిగిలిన ప్రాంతాలు, ఛత్తీస్‌గఢ్‌, ఝార్ఖండ్‌, బిహార్‌లోని అదనపు ప్రాంతాలకు రుతుపవనాలు విస్తరించేందుకు పరిస్థితులు అనుకూలంగా ఉన్నాయని ఐఎండీ తెలిపింది. ముంబయిలో రుతుపవనాల అధికారిక ప్రవేశాన్ని అవసరమైన వాతావరణ ప్రమాణాలు నెరవేరిన తర్వాత ప్రకటిస్తామని అధికారులు పేర్కొన్నారు.

పశ్చిమ గాలులు బలపడటం, రుతుపవనాల పురోగతితో మహారాష్ట్రలో వర్షాల తీవ్రత పెరిగే అవకాశం ఉంది. జూన్‌ 22 నుంచి 28 వరకు కొంకణ్‌, గోవాలో విస్తృతంగా వర్షాలు కురవవచ్చని అంచనా వేసింది. జూన్‌ 22 నుంచి 25 వరకు కొంకణ్‌, మధ్య మహారాష్ట్రలో పిడుగులు, గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉందని హెచ్చరించింది.

కొంకణ్‌, గోవాలో జూన్‌ 22 నుంచి 28 వరకు అక్కడక్కడ భారీ వర్షాలు కురిసే సూచనలు ఉన్నాయి. మధ్య మహారాష్ట్రలో జూన్‌ 23న భారీ వర్షం కురిసే అవకాశం ఉంది. మరాఠ్వాడాలో జూన్‌ 22 నుంచి 24 వరకు ఉరుములు, మెరుపులు, బలమైన గాలులతో తేలికపాటి నుంచి మోస్తరు వర్షాలు కురవవచ్చని వాతావరణ శాఖ తెలిపింది.

ముంబయిలో సోమవారం ఉదయం బాంద్రా ఈస్ట్‌ సహా పలు ప్రాంతాల్లో ఉరుములు, మెరుపులతో వర్షాలు కురిశాయి. కొన్ని ప్రాంతాల్లో నీరు నిలవడం, ట్రాఫిక్‌కు అంతరాయం కలిగినట్లు సమాచారం. నగరానికి మూడు గంటల తక్షణ హెచ్చరికలో పిడుగులు, మోస్తరు నుంచి తీవ్రమైన వర్షం, గంటకు 30 నుంచి 40 కిలోమీటర్ల వేగంతో గాలులు వీచే అవకాశం ఉందని అధికారులు పేర్కొన్నారు.

దక్షిణ మహారాష్ట్ర–గోవా తీరంలో జూన్‌ 22 నుంచి 26 వరకు గంటకు 40 నుంచి 50 కిలోమీటర్ల వేగంతో గాలులు వీచి, కొన్ని సందర్భాల్లో 60 కిలోమీటర్లకు చేరవచ్చని ఐఎండీ హెచ్చరించింది. ఈ కాలంలో మత్స్యకారులు సముద్రంలోకి వెళ్లవద్దని సూచించింది. తీర ప్రాంతాల్లో సముద్రం అల్లకల్లోలంగా ఉండే అవకాశం ఉంది.

భారీ వర్షాల కారణంగా లోతట్టు, పట్టణ ప్రాంతాల్లో నీరు నిలవడం, రహదారి, రైలు, విమాన, ఫెర్రీ సేవలకు అంతరాయం కలగడం, బలహీన చెట్లు కూలడం, పంటలు దెబ్బతినడం వంటి ప్రభావాలు ఉండవచ్చని అధికారులు తెలిపారు. ప్రజలు ట్రాఫిక్‌ సూచనలు పాటించాలని, బలహీన నిర్మాణాలకు దూరంగా ఉండాలని కోరారు.

ఉరుములు, మెరుపుల సమయంలో బహిరంగ ప్రదేశాలు, చెట్లు, విద్యుత్‌ను ప్రసారం చేసే వస్తువుల దగ్గర నిలవకూడదు. నీటి వనరుల నుంచి వెంటనే బయటకు రావాలి. వాతావరణ పరిస్థితులు వేగంగా మారే అవకాశం ఉన్నందున ఐఎండీ, స్థానిక సంస్థలు విడుదల చేసే తాజా హెచ్చరికలను అనుసరించాలని సూచించారు.

రైతులు పక్వానికి వచ్చిన పంటలను వీలైనంత త్వరగా కోయాలని, నిల్వ ధాన్యాన్ని సురక్షిత ప్రదేశాలకు తరలించాలని సూచించారు. పొలాల్లో అదనపు నీరు బయటకు వెళ్లే ఏర్పాట్లు చేయాలని, పిడుగుల సమయంలో పశువులను షెడ్లలో ఉంచాలని వ్యవసాయ వాతావరణ సలహాలో పేర్కొన్నారు.