తమిళనాడు రైతులకు రూ.75 వేల వరకు రుణమాఫీ

తమిళనాడు రైతులకు సీఎం విజయ్ కీలక ప్రకటన చేశారు. సహకార బ్యాంకుల ద్వారా పంట రుణాలు తీసుకున్న రైతులకు మరింత ఉపశమనం కల్పించేలా రుణమాఫీ పథకంలో సవరణలు చేశారు. పాత నిబంధనలపై రైతు సంఘాలు, వివిధ వర్గాల నుంచి అభ్యంతరాలు రావడంతో ప్రభుత్వం ఈ నిర్ణయం తీసుకుంది.

తాజా మార్గదర్శకాల ప్రకారం, సహకార బ్యాంకుల నుంచి రూ.75,000 వరకు పంట రుణాలు తీసుకున్న రైతులకు పూర్తి రుణమాఫీ వర్తించనుంది. ఇందులో సన్నకారు, చిన్న, ఇతర రైతుల మధ్య తేడా లేకుండా ఒకే విధానం అమలు చేయనున్నట్టు ప్రభుత్వం పేర్కొంది. రూ.75,000 కంటే ఎక్కువ రుణం ఉన్న రైతులకు ఒక్కొక్కరికి రూ.35,000 చొప్పున మాఫీ ఇవ్వనున్నారు.

ఈ పథకం 2025 మే 1 నుంచి 2026 ఫిబ్రవరి 28 మధ్య సహకార బ్యాంకుల ద్వారా తీసుకున్న పంట రుణాలకు వర్తించనుంది. గత నెలలో ప్రకటించిన పాత విధానంలో సన్నకారు రైతులకు మాత్రమే ఎక్కువ ప్రయోజనం ఉండగా, ఇతర రైతులకు పరిమిత ఉపశమనం మాత్రమే లభించింది. దీనిపై రైతుల నుంచి అసంతృప్తి వ్యక్తమైంది. ఆ అభ్యంతరాలను పరిగణనలోకి తీసుకుని సీఎం విజయ్ సచివాలయంలో మంత్రులు, ఉన్నతాధికారులతో సమీక్ష నిర్వహించారు.

తాజా సవరణలతో రాష్ట్రవ్యాప్తంగా దాదాపు 14.43 లక్షల మంది రైతులకు లబ్ధి చేకూరనుందని ప్రభుత్వం తెలిపింది. ఈ నిర్ణయంతో రాష్ట్ర ఖజానాపై సుమారు రూ.5,932 కోట్ల అదనపు భారం పడనుంది. అయినప్పటికీ రైతుల అప్పు ఒత్తిడిని తగ్గించడమే ప్రధాన లక్ష్యమని ప్రభుత్వం స్పష్టం చేసింది.

రుణమాఫీ కింద సహకార బ్యాంకులకు చెల్లించాల్సిన మొత్తాన్ని ప్రభుత్వం నిర్దిష్ట గడువులో రీ ఇంబర్స్ చేయనుంది. రిజర్వ్ బ్యాంక్ మార్గదర్శకాలకు అనుగుణంగా చెల్లింపులు పూర్తిచేయాలని ఆర్థిక శాఖ చర్యలు చేపడుతోంది.

ఈ నిర్ణయం రైతులపై ఉన్న తక్షణ అప్పు భారాన్ని తగ్గించే అవకాశం ఉంది. అయితే ప్రభుత్వంపై పడే భారీ ఆర్థిక భారం, సహకార బ్యాంకుల నగదు ప్రవాహం, భవిష్యత్ పంట రుణాల పంపిణీపై దీని ప్రభావం కూడా కీలకంగా మారనుంది. రుణమాఫీ అమలు వేగం, లబ్ధిదారుల గుర్తింపు స్పష్టతే ఈ పథకం ఫలితాన్ని నిర్ణయించనున్నాయి.