ఫీల్డింగ్‌లో కోహ్లీ ఎనర్జీ అద్భుతం.. మాజీ కోచ్ దిలీప్ ప్రశంసలు

భారత స్టార్ ప్లేయర్ విరాట్ కోహ్లీ ఫీల్డింగ్ నైపుణ్యంపై టీమిండియా మాజీ ఫీల్డింగ్ కోచ్ టి. దిలీప్ ప్రశంసలు కురిపించాడు.కోహ్లీ ఫీల్డింగ్‌లో చూపించే ఎనర్జీ, అంకితభావం జట్టులోని ఇతర ఆటగాళ్లపై కూడా ప్రభావం చూపుతుందని పేర్కొన్నాడు.విరాట్ కోహ్లీ ఫీల్డింగ్ విషయంలో ఎప్పుడూ రాజీ పడడని దిలీప్ తెలిపాడు.పవర్‌ప్లే సమయంలో కవర్స్, షార్ట్ మిడ్ వికెట్ వంటి స్థానాల్లో అతడి రిఫ్లెక్సులు, డైవ్స్, బంతిని ఆపే విధానం అద్భుతంగా ఉంటాయని వివరించాడు.బంతి తన వైపు రాకపోయినా ఫీల్డింగ్‌లో అతడి ప్రయత్నం ఆగదని, నాన్‌స్ట్రైకర్ ఎండ్ వైపు పరుగెత్తి త్రో అందించడం వంటి విషయాల్లోనూ అతడి చురుకుదనం కనిపిస్తుందని చెప్పాడు.కోహ్లీ ప్రాక్టీస్‌లో ఎలా ఉంటాడో మ్యాచ్‌లో కూడా అలాగే ఉంటాడని దిలీప్ పేర్కొన్నాడు.అతడితో కలిసి ఫీల్డింగ్ చేసే ఆటగాళ్లు తమ స్థాయిని మరింత పెంచుకునేలా కోహ్లీ ప్రేరణ ఇస్తాడని తెలిపాడు.2021 నవంబర్‌లో భారత జట్టు సహాయక బృందంలో చేరిన టి. దిలీప్ ఇటీవల ఫీల్డింగ్ కోచ్ బాధ్యతల నుంచి తప్పుకున్నాడు.అతడి హయాంలో భారత జట్టు పలు ఐసీసీ, ఆసియా స్థాయి టోర్నీల్లో విజయాలు సాధించింది. 2024, 2026 టీ20 ప్రపంచకప్‌లు, 2025 ఛాంపియన్స్ ట్రోఫీ వంటి విజయాల్లో దిలీప్ భాగస్వామ్యం ఉంది.