యూఎస్ ఓపెన్‌లో అల్కరాజ్ అదిరిపోయే రీఎంట్రీ.. తొలి రౌండ్‌లో ఘన విజయం

యూఎస్ ఓపెన్‌లో డిఫెండింగ్ ఛాంపియన్ కార్లోస్ అల్కరాజ్ విజయంతో తన పునరాగమనాన్ని ఘనంగా ప్రారంభించాడు. నాలుగు నెలల విరామం తర్వాత టెన్నిస్ కోర్టులో అడుగుపెట్టిన స్పెయిన్ స్టార్ తొలి రౌండ్‌లోనే తన సత్తా చాటాడు. మణికట్టు గాయం కారణంగా ఏప్రిల్ నుంచి ఆటకు దూరమైన అల్కరాజ్.. ఆర్థర్ యాష్ స్టేడియంలో రష్యా ఆటగాడు రోమన్ సఫియులిన్‌ను 6-4, 6-4, 6-4 తేడాతో వరుస సెట్లలో ఓడించాడు.

మ్యాచ్ ప్రారంభం నుంచే అల్కరాజ్ ప్రత్యర్థిపై ఆధిపత్యం కొనసాగించాడు. శక్తివంతమైన షాట్లు, అద్భుతమైన కదలికలతో ఆకట్టుకుని రెండో రౌండ్‌లోకి ప్రవేశించాడు. సుదీర్ఘ విరామం తర్వాత తిరిగి గ్రాండ్‌స్లామ్ వేదికపై ఆడటం తనకు ప్రత్యేక అనుభూతిని ఇచ్చిందని అల్కరాజ్ తెలిపాడు.

గత కొన్ని నెలలు తనకు చాలా కఠినంగా గడిచాయని, ఆర్థర్ యాష్ స్టేడియంలో మళ్లీ పోటీ పడటం ఎంతో ఆనందంగా ఉందని చెప్పాడు. ప్రేక్షకుల ఉత్సాహం, మ్యాచ్ వాతావరణాన్ని ఎంతో మిస్ అయ్యానని వెల్లడించాడు.

ఈ ఏడాది ఆస్ట్రేలియన్ ఓపెన్ గెలిచిన అల్కరాజ్, సీజన్‌ను మరో గ్రాండ్‌స్లామ్ టైటిల్‌తో ముగించాలని లక్ష్యంగా పెట్టుకున్నాడు. మరోవైపు జకోవిచ్ తొలి రౌండ్‌లోనే నిష్క్రమించడం, యానిక్ సినర్ గాయం కారణంగా దూరం కావడం అతడి టైటిల్ అవకాశాలను పెంచుతున్నాయి.