అర్ధరాత్రి వీడియో కాల్ తర్వాత కానిస్టేబుల్ మృతి.. మలక్‌పేట్‌లో విషాదం

హైదరాబాద్ నగరంలోని మలక్‌పేట్ పోలీస్ స్టేషన్ పరిధిలో పోలీస్ కానిస్టేబుల్ ముత్తె చంద్రశేఖర్ (35) అనుమానాస్పద స్థితిలో మృతిచెందిన ఘటన కలకలం రేపింది. మూసారాంబాగ్ శాలివాహన నగర్‌లోని తన ఇంట్లో ఆయన ఫ్యాన్‌కు ఉరేసుకుని కనిపించారు.

చనిపోయే ముందు అర్ధరాత్రి సమయంలో ఓ యువతికి చంద్రశేఖర్ వీడియో కాల్ చేసినట్లు సమాచారం. తాను ఉరేసుకుంటున్నట్లు ఆమెకు చెప్పడంతో ఆందోళన చెందిన యువతి వెంటనే చైతన్యపురి పోలీసులకు సమాచారం అందించింది. చైతన్యపురి పోలీసులు ఈ విషయాన్ని మలక్‌పేట్ పోలీసులకు తెలియజేయడంతో వారు వెంటనే ఘటనాస్థలికి చేరుకున్నారు.

ఇంట్లోకి వెళ్లి పరిశీలించగా చంద్రశేఖర్ అప్పటికే ఫ్యాన్‌కు వేలాడుతూ కనిపించినట్లు పోలీసులు తెలిపారు. మృతదేహాన్ని స్వాధీనం చేసుకుని పోస్టుమార్టం నిమిత్తం ప్రభుత్వ ఆస్పత్రికి తరలించారు. ఈ ఘటనపై కేసు నమోదు చేసి దర్యాప్తు ప్రారంభించారు.

మృతుడు చంద్రశేఖర్ అంబర్‌పేట్ హెడ్‌క్వార్టర్స్‌లో రైటర్‌గా విధులు నిర్వహిస్తున్నట్లు సమాచారం. అయితే ఆయన మృతికి గల పూర్తి కారణాలు ఇంకా తెలియాల్సి ఉందని పోలీసులు తెలిపారు. ఈ ఘటన స్థానికంగా తీవ్ర విషాదాన్ని నెలకొల్పింది.