372 మంది లబ్ధిదారులకు ఇళ్ల పట్టాలు పంపిణీ చేసిన మంత్రి నారా లోకేశ్

ఆంధ్రప్రదేశ్ విద్య, ఐటీశాఖల మంత్రి నారా లోకేశ్ తాడేపల్లి మండలం కుంచనపల్లిలో నిర్వహించిన ‘మన ఇల్లు – మన లోకేశ్’ కార్యక్రమంలో 372 మంది లబ్ధిదారులకు ఇళ్ల పట్టాలను పంపిణీ చేశారు. శ్రీ శ్రీనివాస కన్వెన్షన్స్‌లో జరిగిన ఈ కార్యక్రమంలో దీర్ఘకాలంగా ప్రభుత్వ భూముల్లో నివసిస్తున్న పేదలకు శాశ్వత పట్టాలను అందజేశారు.

గత ఎన్నికల్లో ఇచ్చిన హామీ మేరకు ఇళ్ల పట్టాల సమస్యను పరిష్కరించేందుకు చర్యలు చేపట్టినట్లు మంత్రి లోకేశ్ తెలిపారు. ఇప్పటికే నియోజకవర్గంలో దాదాపు 80 శాతం పట్టాల సమస్య పరిష్కారమైందని వెల్లడించారు. ఇంకా మిగిలి ఉన్న కేంద్ర ప్రభుత్వ భూములకు సంబంధించిన సమస్యలను పరిష్కరించేందుకు సంబంధిత వర్గాలతో సంప్రదింపులు కొనసాగుతున్నాయని చెప్పారు.

పట్టాల పంపిణీలో భాగంగా తొలి విడతలో 3,002 మందికి, రెండో విడతలో 2,634 మందికి ఇళ్ల పట్టాలు అందజేసినట్లు మంత్రి తెలిపారు. మొదటి రెండు విడతల్లో దాదాపు రూ.2 వేల కోట్ల విలువైన భూములకు ఉచిత శాశ్వత పట్టాలను పంపిణీ చేసినట్లు పేర్కొన్నారు.

అటవీ, ఇరిగేషన్, రెవెన్యూ, దేవాదాయ, ఆర్‌అండ్‌బీ, పంచాయతీరాజ్ శాఖలకు సంబంధించిన భూముల్లో నివసిస్తున్న పేదలకు హక్కులు కల్పించే దిశగా చర్యలు చేపట్టినట్లు తెలిపారు. వివిధ ప్రభుత్వ శాఖల సమన్వయంతో భూ సమస్యలను పరిష్కరిస్తూ అర్హులైన లబ్ధిదారులకు పట్టాలు అందజేస్తున్నట్లు మంత్రి వివరించారు.