ఇరాన్తో యుద్ధం కొనసాగుతున్న నేపథ్యంలో అమెరికా కీలక ప్రకటన చేసింది. ఇరాన్ అణు కార్యక్రమానికి సంబంధించిన రహస్య సమాచారం అందించిన వారికి భారీ నగదు బహుమతి ఇస్తామని వెల్లడించింది. విలువైన సమాచారం అందించే వ్యక్తులకు 20 మిలియన్ డాలర్ల వరకు రివార్డు అందజేస్తామని ప్రకటించింది. భారత కరెన్సీలో ఈ మొత్తం సుమారు రూ.170 కోట్లుగా పేర్కొంది.
అమెరికా విదేశాంగ శాఖ ఆధ్వర్యంలోని 'రివార్డ్స్ ఫర్ జస్టిస్' కార్యక్రమం ద్వారా ఈ బహుమతిని ప్రకటించినట్లు అమెరికా సెంట్రల్ కమాండ్ వెల్లడించింది. ఇరాన్ అణు కార్యక్రమానికి సంబంధించిన కీలక వివరాలను సేకరించడమే ఈ ప్రకటన ప్రధాన ఉద్దేశమని తెలిపింది.
ముఖ్యంగా ఇరాన్లోని అణు కేంద్రాలు, అక్కడ ఉపయోగిస్తున్న పరికరాలు, సాంకేతిక వ్యవస్థలు, అణు పరిశోధనల్లో పాల్గొంటున్న శాస్త్రవేత్తలు, ఇతర సిబ్బందికి సంబంధించిన సమాచారాన్ని అందించాలని కోరింది.
అణు కార్యక్రమానికి సంబంధించిన విశ్వసనీయమైన సమాచారం అందించే వ్యక్తులకు అవసరమైతే సురక్షిత ప్రాంతాలకు తరలించే ఏర్పాట్లు కూడా చేస్తామని అమెరికా వెల్లడించింది. అయితే ఏ స్థాయి సమాచారం అందిస్తే పూర్తి 20 మిలియన్ డాలర్ల బహుమతి లభిస్తుందనే విషయంపై స్పష్టమైన మార్గదర్శకాలను వెల్లడించలేదు.
మరోవైపు ఇరాన్ అణు కార్యక్రమంపై అమెరికా అధ్యక్షుడు డొనాల్డ్ ట్రంప్ ఇప్పటికే పలుమార్లు కీలక వ్యాఖ్యలు చేశారు. అమెరికా సైనిక చర్యల కారణంగా ఇరాన్ అణు సామర్థ్యం తీవ్రంగా దెబ్బతిన్నదని ఆయన పేర్కొన్నారు.
గత ఎనిమిది నెలలుగా కొనసాగుతున్న యుద్ధం కారణంగా ఇరాన్ ఆర్థిక వ్యవస్థ, సైనిక సామర్థ్యం తీవ్రంగా దెబ్బతిన్నాయని ట్రంప్ పేర్కొన్నారు. ప్రస్తుతం ఇరాన్ యుద్ధాన్ని ముగించేందుకు సిద్ధంగా ఉందని, ఒప్పందం దిశగా ప్రయత్నాలు జరుగుతున్నాయని తెలిపారు.
ఈ ప్రకటనతో అమెరికా, ఇరాన్ మధ్య కొనసాగుతున్న ఉద్రిక్తతలు, అణు కార్యక్రమంపై నిఘా కార్యకలాపాలు మరోసారి చర్చనీయాంశంగా మారాయి. రాబోయే రోజుల్లో ఇరు దేశాల మధ్య చర్చలు, యుద్ధ ముగింపు ప్రయత్నాలు ఎలాంటి మలుపు తిరుగుతాయనే అంశంపై ఆసక్తి నెలకొంది.
ఇరాన్ అణు రహస్యాలకు రూ.170 కోట్ల భారీ రివార్డు.. కీలక సమాచారం ఇస్తే బహుమతి ప్రకటించిన అమెరికా!
16
Published: 📅
Reported by: 🖊
Sarika Sk