అమెరికాతో కొనసాగుతున్న యుద్ధానికి ముగింపు పలికేందుకు ఇరాన్ కీలక ప్రతిపాదన చేసింది. గత ఎనిమిది నెలలుగా కొనసాగుతున్న ఘర్షణలను దౌత్యపరంగా పరిష్కరించేందుకు సిద్ధంగా ఉన్నట్లు ప్రకటించింది. అయితే ఇందుకోసం అమెరికా తమ షరతులను అంగీకరించాలని స్పష్టం చేసింది.
ఇరాన్ విదేశాంగ మంత్రి అబ్బాస్ అరాగ్చీ మాట్లాడుతూ సైనిక చర్యలు, ఆర్థిక ఆంక్షలతో సమస్యకు పరిష్కారం లభించదని పేర్కొన్నారు. పరస్పర గౌరవంతో చర్చలు జరిపి తమ డిమాండ్లను పరిష్కరించినప్పుడే యుద్ధానికి ముగింపు సాధ్యమని తెలిపారు.
ముఖ్యంగా ప్రపంచ చమురు రవాణాకు కీలకమైన హోర్ముజ్ జలసంధిని తిరిగి తెరిచేందుకు ఇరాన్ రెండు రోజుల ప్రతిపాదనను ముందుకు తెచ్చింది. అమెరికా తమ షరతులకు అంగీకరిస్తే 48 గంటల్లో జలసంధిని తెరిచేందుకు సిద్ధమని వెల్లడించింది.
ఈ ప్రతిపాదనలో భాగంగా అన్ని రంగాల్లో యుద్ధాన్ని పూర్తిగా నిలిపివేయాలని ఇరాన్ డిమాండ్ చేసింది. విదేశాల్లో స్తంభింపజేసిన తమ ఆస్తులను విడుదల చేయాలని కోరింది.
అలాగే ఇరాన్ చమురు ఎగుమతులపై విధించిన ఆంక్షలను ఎత్తివేయాలని, తమ నౌకాశ్రయాలపై అమెరికా అమలు చేస్తున్న సముద్ర దిగ్బంధనాన్ని తొలగించాలని స్పష్టం చేసింది.
ఈ షరతులు నెరవేరితే హోర్ముజ్ జలసంధిలో నౌకల రాకపోకలను పునరుద్ధరించేందుకు అవకాశం ఉంటుందని ఇరాన్ పేర్కొంది. అయితే అమెరికా నుంచి పూర్తిస్థాయి అంగీకారం లభించినట్లు సమాచారం లేదు.
మరోవైపు అమెరికా అధ్యక్షుడు డొనాల్డ్ ట్రంప్ యుద్ధం ముగింపు దిశగా సానుకూల పరిణామాలు చోటుచేసుకుంటున్నాయని వ్యాఖ్యానించారు. తిరిగి భారీ స్థాయిలో సైనిక చర్యలు ప్రారంభమయ్యే అవకాశాలు తక్కువగా ఉన్నాయని సంకేతాలిచ్చారు.
అయితే ఇరు దేశాల మధ్య ప్రధాన అంశాలపై విభేదాలు కొనసాగుతున్నాయి. ముఖ్యంగా ఇరాన్ అణు కార్యక్రమాన్ని చర్చల్లో భాగం చేయాలని అమెరికా పట్టుబడుతోంది.
ఇరాన్ మాత్రం ముందుగా ఆంక్షల తొలగింపు, ఆస్తుల విడుదల, సముద్ర దిగ్బంధనం ముగింపు వంటి అంశాలకు ప్రాధాన్యం ఇవ్వాలని కోరుతోంది.
హోర్ముజ్ జలసంధి అంతర్జాతీయ చమురు రవాణాకు అత్యంత కీలకమైన మార్గం. దీని మూసివేత ప్రపంచ ఇంధన సరఫరా వ్యవస్థపై ప్రభావం చూపుతోంది.
యుద్ధం ముగించాలంటే మా షరతులు అంగీకరించాలి.. అమెరికాకు ఇరాన్ కీలక ప్రతిపాదన, హోర్ముజ్ జలసంధిపై కీలక ప్రకటన!
6
Published: 📅
Reported by: 🖊
Subba Lagadapati