హోర్ముజ్ జలసంధిలో ఉద్రిక్తత క్షిపణి దాడి వార్తలను ఖండించిన అమెరికా

హోర్ముజ్ జలసంధిలో తాజా పరిణామాలు అంతర్జాతీయ స్థాయిలో ఉద్రిక్తతను పెంచుతున్నాయి. ఇరాన్ ప్రభుత్వ మాధ్యమాలు అమెరికా నౌకపై రెండు క్షిపణులు ప్రయోగించినట్లు పేర్కొన్నాయి. అయితే ఈ వార్తలను అమెరికా సైన్యం ఖండించింది. తమ నౌకలకు ఎలాంటి నష్టం జరగలేదని స్పష్టం చేసింది.

అమెరికా కేంద్ర కమాండ్ ప్రకారం హోర్ముజ్ ప్రాంతంలో ఉన్న తమ నౌకలు సురక్షితంగానే ఉన్నాయని తెలిపారు. అలాగే ఇరాన్ పోర్టులపై అమలు చేస్తున్న నౌకా నిరోధ చర్యలకు మద్దతుగా తమ బలగాలు కొనసాగుతున్నాయని పేర్కొన్నారు. మరోవైపు ఇరాన్ నుంచి వచ్చిన సమాచారం ప్రకారం అమెరికా నౌకను లక్ష్యంగా చేసుకుని క్షిపణులు ప్రయోగించినట్లు వెల్లడించారు.

ఈ ఘటనపై అధికారిక స్థాయిలో పూర్తి స్పష్టత లేకపోవడం పరిస్థితిని మరింత క్లిష్టంగా మార్చింది. ఇరు దేశాల మధ్య ఉన్న ఉద్రిక్తతల నేపథ్యంలో ఈ వార్తలు ప్రపంచ దృష్టిని ఆకర్షిస్తున్నాయి. ఇరాన్ ఇప్పటికే అమెరికా బలగాలు ఈ జలసంధిలోకి రాకూడదని హెచ్చరించింది.

ఇటీవల అమెరికా అధ్యక్షుడు ట్రంప్ హోర్ముజ్ లో ఇరుక్కున్న నౌకలను బయటకు తీసుకువస్తామని చేసిన వ్యాఖ్యల తర్వాత పరిస్థితి మరింత వేడెక్కింది. ఈ నేపథ్యంలో జరిగిన తాజా పరిణామాలు ఇరాన్ అమెరికా సంబంధాలను మరింత ఉద్రిక్తంగా మార్చే అవకాశాలు కనిపిస్తున్నాయి.

హోర్ముజ్ జలసంధి ప్రపంచ చమురు రవాణాలో కీలక మార్గం కావడంతో ఇక్కడి ఉద్రిక్తత ప్రపంచ ఆర్థిక వ్యవస్థపై ప్రభావం చూపే అవకాశం ఉంది. ఈ ఘటనపై స్పష్టమైన సమాచారం వెలువడే వరకు అంతర్జాతీయ స్థాయిలో అప్రమత్తత కొనసాగుతుంది.