పురుగుమందుల అవశేషాలతో ‘తేజ’ మిర్చి ఎగుమతులకు అడ్డంకి

గుంటూరు మిర్చి ఎగుమతులకు చైనా నుంచి గట్టి ఎదురుదెబ్బ తగిలినట్లు సమాచారం. భారత్‌ నుంచి ఎగుమతి అయ్యే ఎండుమిర్చిలో అనుమతించదగిన పరిమితికి మించి పురుగుమందుల అవశేషాలు ఉన్నాయని గుర్తించిన చైనా కస్టమ్స్ అధికారులు, గుంటూరు ప్రాంతానికి చెందిన కొన్ని కన్సైన్‌మెంట్లను తిరస్కరించినట్లు ఎగుమతి వర్గాలు చెబుతున్నాయి.

సమాచారం ప్రకారం, గుంటూరుకు చెందిన మూడు ప్రధాన మిర్చి కన్సైన్‌మెంట్లను వెనక్కి పంపడంతో పాటు, సదరు ముగ్గురు భారతీయ ఎగుమతిదారుల నుంచి దిగుమతులను తాత్కాలికంగా నిలిపివేశారు. దీంతో చైనాకు వెళ్లాల్సిన ఆర్డర్లు ఆగిపోవడంతో స్థానిక వ్యాపారులు ఆందోళన చెందుతున్నారు. ముఖ్యంగా చైనా మార్కెట్‌లో విపరీతమైన డిమాండ్ ఉన్న ‘తేజ’ రకం మిర్చి నిల్వలను కొందరు వ్యాపారులు కోల్డ్ స్టోరేజీలకు తరలిస్తున్నట్లు తెలుస్తోంది.

వ్యవసాయ రసాయన నిపుణుల విశ్లేషణ ప్రకారం, పంటపై తెగుళ్ల నివారణ కోసం రైతులు విస్తృతంగా ఉపయోగించే కొన్ని పురుగుమందుల ప్రభావమే ఈ సమస్యకు ప్రధాన కారణంగా ఉండొచ్చు. ముఖ్యంగా ‘ఎసిఫేట్’ వాడకం వల్ల మిర్చిలో ‘మెథామిడోఫాస్’ అనే ప్రమాదకర రసాయన అవశేషాలు ఏర్పడే అవకాశం ఉందని వారు చెబుతున్నారు. ఈ అవశేషాలు అంతర్జాతీయ ఆహార భద్రతా ప్రమాణాల పరిమితిని మించడాన్ని చైనా ల్యాబ్ పరీక్షలు గుర్తించినట్లు సమాచారం.

సమస్యను తీవ్రంగా పరిగణించిన స్పైసెస్ బోర్డ్, రాష్ట్ర ఉద్యానవన శాఖ అధికారులు గుంటూరు ఎగుమతిదారులతో అత్యవసర సమావేశాలు నిర్వహిస్తున్నారు. ఎగుమతులకు వెళ్లే మిర్చిపై ముందస్తు నాణ్యత తనిఖీలు ఎలా కట్టుదిట్టం చేయాలి, రైతులకు ఎలాంటి అవగాహన కల్పించాలి, అంతర్జాతీయ ప్రమాణాలకు అనుగుణంగా ఎగుమతులను ఎలా సిద్ధం చేయాలి అనే అంశాలపై చర్చలు జరుగుతున్నాయి.ఇప్పటివరకు భారత మిర్చిపై చైనా పూర్తిస్థాయి నిషేధం విధించలేదని వర్గాలు చెబుతున్నప్పటికీ, ముగ్గురు ఎగుమతిదారులపై విధించిన సస్పెన్షన్‌ను ఎత్తివేయించేందుకు ప్రయత్నాలు కొనసాగుతున్నాయి. కొత్త పంట సీజన్‌కు ముందే క్షేత్రస్థాయిలో నియంత్రణ చర్యలు, అవగాహన కార్యక్రమాలు, కఠిన నాణ్యత పరీక్షలు చేపట్టాలని అధికారులు యోచిస్తున్నారు. గుంటూరు మిర్చి ఎగుమతులు తిరిగి సాధారణ స్థితికి రావాలంటే నాణ్యత నియంత్రణే కీలక అంశంగా మారింది.