కరీంనగర్ జిల్లా జమ్మికుంట వ్యవసాయ మార్కెట్లో పత్తి వ్యాపారం గణనీయంగా పడిపోయింది. గతేడాదితో పోలిస్తే ఈసారి పత్తి ధరలు పెరిగినప్పటికీ కొనుగోళ్ల పరిమాణం భారీగా తగ్గింది. దీంతో మార్కెట్లో లావాదేవీల విలువ సగానికి పైగా పడిపోయినట్లు గణాంకాలు వెల్లడిస్తున్నాయి.
జమ్మికుంట వ్యవసాయ మార్కెట్లో సెప్టెంబర్ 23న పత్తి కొనుగోళ్లు ప్రారంభమయ్యాయి. నవంబర్ 10 నాటికి 47 రోజుల వ్యాపారానికి సంబంధించిన వివరాలు వెల్లడయ్యాయి.
ఈ కాలంలో రైతులు మార్కెట్ యార్డులో 21 వేల క్వింటాళ్ల పత్తిని విక్రయించారు. జిన్నింగ్ మిల్లులు, బీ టైప్ వ్యాపారుల గోదాముల్లో నేరుగా మరో 10 వేల క్వింటాళ్ల కొనుగోళ్లు జరిగాయి. మొత్తంగా 31 వేల క్వింటాళ్ల పత్తి వ్యాపారం నమోదైంది.
గతేడాది ఇదే సమయానికి 83 వేల క్వింటాళ్ల పత్తి కొనుగోళ్లు జరగడం గమనార్హం. అంటే ఈసారి 52 వేల క్వింటాళ్ల కొనుగోళ్లు తగ్గాయి. శాతాల వారీగా చూస్తే సుమారు 62 శాతం క్షీణత నమోదైంది.
అయితే పత్తి ధరల్లో మాత్రం పెరుగుదల కనిపించింది. గతేడాది క్వింటాల్ పత్తికి కనిష్ఠంగా రూ.7,250, గరిష్ఠంగా రూ.7,600 ధర లభించింది.
ఈసారి కనిష్ఠ ధర రూ.8,350 కాగా, గరిష్ఠ ధర రూ.9,250 వరకు నమోదైంది. దీంతో కనిష్ఠ ధరలో రూ.1,100, గరిష్ఠ ధరలో రూ.1,650 పెరుగుదల కనిపించింది.
ధరలు పెరిగినా కొనుగోళ్లు తగ్గడంతో మొత్తం వ్యాపార విలువపై తీవ్ర ప్రభావం పడింది. గతేడాది సగటు ధర రూ.7,425 ప్రకారం సుమారు రూ.61.62 కోట్ల విలువైన లావాదేవీలు జరిగా
ఈసారి సగటు ధర రూ.8,800గా లెక్కిస్తే 31 వేల క్వింటాళ్లకు సుమారు రూ.27.28 కోట్ల వ్యాపారం నమోదైంది. దీంతో గతేడాదితో పోలిస్తే లావాదేవీల విలువ రూ.34.34 కోట్లు తగ్గినట్లు అంచనా.
పత్తి కొనుగోళ్ల తగ్గుదల మార్కెట్ కమిటీ ఆదాయంపైనా ప్రభావం చూపనుంది. ఒక శాతం మార్కెట్ ఫీజు ప్రకారం ఈసారి సుమారు రూ.27.28 లక్షల ఆదాయం సమకూరే అవకాశముంది.
పత్తి ధరలు పెరిగినా వ్యాపారం ఢీలా.. జమ్మికుంట మార్కెట్లో 62 శాతం తగ్గిన కొనుగోళ్లు, రూ.34 కోట్ల మేర లావాదేవీల పతనం!
7
Published: 📅
Reported by: 🖊
Banu Prakash
📍 ఆంధ్రప్రదేశ్