ఇజ్రాయెల్‌పై ఇరాన్ క్షిపణి దాడులు.. డిమోనా సమీపంలో భయాందోళన

మధ్యప్రాచ్యంలో ఉద్రిక్త పరిస్థితులు మరింత తీవ్రమవుతున్నాయి. ఇరాన్ తాజాగా ఇజ్రాయెల్‌పై బాలిస్టిక్ క్షిపణులతో భారీ దాడులు జరిపింది. ముఖ్యంగా డిమోనా నగరంలోని అణు పరిశోధనా కేంద్రం సమీప ప్రాంతాలు లక్ష్యంగా ఈ దాడులు జరిగాయి. ఈ కేంద్రం ఇజ్రాయెల్‌కు అత్యంత కీలకమైనదిగా భావించబడుతోంది.

సంబంధిత వర్గాల సమాచారం ప్రకారం, అణు పరిశోధనా కేంద్రానికి ఎలాంటి నష్టం జరగలేదు. అయితే దాని సమీపంలోని నివాస ప్రాంతాలు తీవ్రంగా దెబ్బతిన్నాయి. క్షిపణులు భవనాలపై పడటంతో భారీ పేలుళ్లు సంభవించాయి. అగ్నికీలలు ఎగసిపడడంతో అనేక భవనాలు పూర్తిగా ధ్వంసమయ్యాయి.

అరాద్ నగరంలో జరిగిన దాడిలో దాదాపు 88 మంది గాయపడగా, వారిలో కొందరి పరిస్థితి విషమంగా ఉన్నట్లు సమాచారం. అలాగే డిమోనా ప్రాంతంలో జరిగిన మరో దాడిలో 40 మందికి పైగా గాయపడ్డారు. గాయపడిన వారిలో చిన్నపిల్లలు కూడా ఉన్నట్లు తెలుస్తోంది. శిథిలాల కింద ఇంకా కొందరు చిక్కుకుపోయి ఉండవచ్చని అధికారులు అనుమానిస్తున్నారు.

ఈ దాడుల సమయంలో ఇజ్రాయెల్ రక్షణ వ్యవస్థలు పూర్తిస్థాయిలో పనిచేయలేకపోయినట్లు తెలుస్తోంది. రెండు బాలిస్టిక్ క్షిపణులను అడ్డుకోవడంలో విఫలమయ్యారని సమాచారం. ఈ వైఫల్యంపై ఇజ్రాయెల్ సైన్యం దర్యాప్తు ప్రారంభించింది.

ఇటీవల ఇరాన్‌లోని నతాంజ్ అణు శుద్ధి కేంద్రంపై జరిగిన దాడులకు ప్రతీకారంగా ఈ చర్యలు తీసుకున్నట్లు తెలుస్తోంది. టెహ్రాన్ నుంచి వచ్చిన ఈ దాడులు ప్రాంతీయ భద్రతపై మరింత ఆందోళనలు పెంచుతున్నాయి.

ఇజ్రాయెల్ ప్రధానమంత్రి బెంజమిన్ నెతన్యాహు ఈ దాడులను తీవ్రంగా ఖండించారు. గాయపడిన వారికి తక్షణ వైద్య సహాయం అందించాలని అధికారులను ఆదేశించారు. అలాగే ఈ దాడులకు తగిన ప్రతిస్పందన ఇస్తామని స్పష్టం చేశారు.

మరోవైపు, ఈ ఘటనతో మధ్యప్రాచ్యంలో యుద్ధ వాతావరణం మరింత ముదురుతోంది. ఇరాన్, ఇజ్రాయెల్ మధ్య పెరుగుతున్న ఉద్రిక్తతలు ప్రపంచ రాజకీయాలపై కూడా ప్రభావం చూపే అవకాశం ఉందని నిపుణులు భావిస్తున్నారు.