ఐటీ ఉద్యోగం వదిలి ఆటో డ్రైవర్‌గా మారిన యువతి.. ఇంగ్లిష్‌ ఫ్లూయెన్సీతో అందరినీ ఆశ్చర్యపరిచింది

కెరీర్ అంటే కేవలం పెద్ద ఉద్యోగం మాత్రమే కాదని నిరూపిస్తూ బెంగళూరుకు చెందిన ఓ యువతి తీసుకున్న నిర్ణయం ప్రస్తుతం సోషల్ మీడియాలో చర్చనీయాంశంగా మారింది. ఐటీ రంగంలో ఉద్యోగం చేస్తున్న ఆమె, కుటుంబ పరిస్థితుల కారణంగా ఆ ఉద్యోగానికి రాజీనామా చేసి ఆటో డ్రైవర్‌గా మారింది.

ఆమె ఆటోలో ప్రయాణించిన కంటెంట్ క్రియేటర్ తన్వి ఈ అనుభవాన్ని సోషల్ మీడియాలో పంచుకున్నారు. సాధారణంగా ఆటో నడుపుతున్న యువతిని చూసిన తన్వి, ఆమె ఇంగ్లిష్‌లో ఎంతో చక్కగా మాట్లాడటంతో ఆశ్చర్యపోయారు. మాట్లాడిన తర్వాత ఆమె నేపథ్యం తెలుసుకుని మరింత ఆశ్చర్యానికి గురయ్యారు.

యువతి తన తల్లిదండ్రులకు ఒక్కగానొక్క సంతానమని, తండ్రి మరణించిన తర్వాత తల్లికి తోడుగా ఉండేందుకు ఈ నిర్ణయం తీసుకున్నట్లు తెలిపారు. ఐటీ ఉద్యోగంలో రాత్రి షిఫ్టుల కారణంగా తల్లికి దూరంగా ఉండాల్సి రావడంతో ఉద్యోగాన్ని వదిలేశానని చెప్పారు.

బంధువులు, స్నేహితులు ఈ నిర్ణయాన్ని వ్యతిరేకించినప్పటికీ, తనకు అనుకూలంగా ఉండే జీవన విధానాన్ని ఎంచుకున్నట్లు యువతి పేర్కొన్నారు. ఆటో డ్రైవింగ్‌లో తనకు పని చేసే సమయంపై స్వేచ్ఛ ఉంటుందని, అందుకే ఈ వృత్తిని ఎంచుకున్నట్లు తెలిపారు.

"జీవితంలో మనకు నచ్చిన మార్గాన్ని ఎంచుకోవడానికి ఒక్కోసారి ధైర్యం అవసరం" అనే ఆమె ఆలోచన పలువురిని ఆకట్టుకుంది. కష్ట పరిస్థితుల్లోనూ తన నిర్ణయాన్ని అమలు చేసిన తీరు, తల్లిపై ఉన్న బాధ్యత పట్ల ఆమె చూపిన నిబద్ధతకు నెటిజన్లు ప్రశంసలు కురిపిస్తున్నారు.