మత్స్యకారులకు ఇచ్చిన హామీ అమలు

అమరావతి, మే 20: డిప్యూటీ సీఎం పవన్ కల్యాణ్ మత్స్యకారుల సంక్షేమ పథకాలను అమలులోకి తెచ్చే క్రమంలో ప్రభుత్వం తీసుకుంటున్న చర్యలను వివరించారు. మత్స్యకారుల వలసలను తగ్గించి, తీరప్రాంతాల్లో వారికి స్థిరమైన ఉపాధి అవకాశాలను కల్పించడం ప్రభుత్వ ప్రాధాన్యత అని ఆయన స్పష్టం చేశారు. వార్షికంగా ‘మత్స్యకార సేవలో’ పథకం నిధులు విడుదల అవుతున్నాయని, అర్హులైన ప్రతి కుటుంబానికి రూ.20 వేల సాయం నేరుగా బ్యాంకు ఖాతాల్లో జమ చేస్తున్నట్లు వివరించారు.

గత ప్రభుత్వంతో పోల్చితే, మంజూరు మొత్తాన్ని రెట్టింపు చేసి రాష్ట్రంలోని 1.30 లక్షల మంది మత్స్యకారులకు లబ్ధి కలిగేలా రూ.262 కోట్లు కేటాయించబడినట్లు వెల్లడించారు. కాకినాడ జిల్లాలో 24,930 మంది లబ్ధిదారులకు రూ.49.86 కోట్లు, పిఠాపురం నియోజకవర్గంలో 6,897 మంది లబ్ధిదారులకు రూ.13.79 కోట్ల లబ్ధి చేకూరనుందని తెలిపారు.

కోస్తా తీర పరిధిలోని 119 కిలోమీటర్లలో 23 ల్యాండింగ్ సెంటర్లు, 51 మత్స్యకార గ్రామాలకు ప్రభుత్వం అందించిన పథకాలు ఉపాధికి తోడ్పడతాయని డిప్యూటీ సీఎం చెప్పారు. 4,578 మత్స్యకార బోట్ల కోసం 91.48 లక్షల లీటర్ల డీజిల్‌పై రూ.8.23 కోట్ల సబ్సిడీ, ఇంజిన్లు, వలలు, బోట్లు, ఆటోలు, ద్విచక్ర వాహనాల కొరకు రూ.1.13 కోట్ల సబ్సిడీ కూడా అందించబడింది.

కోనపాపపేట గ్రామంలో 2 కోట్ల వ్యయంతో కమ్యూనిటీ హాల్ నిర్మించబడుతున్నట్లు, సముద్రంలో వేటకు వెళ్లే మత్స్యకారులకు ఉచితంగా 100% సబ్సిడీతో ట్రాన్స్‌పాండర్స్ అందిస్తున్నట్లు వివరించారు. 20 ప్రాంతాల్లో ఆర్టిఫిషియల్ రిఫ్స్ ఏర్పాటు చేసి సముద్ర జీవ వైవిధ్యాన్ని పెంచడం లక్ష్యంగా ఉన్నట్లు పవన్ కల్యాణ్ వెల్లడించారు.

ముఖ్యమంత్రి చంద్రబాబు నాయుడు సమర్థ నాయకత్వంలో, ఎన్ని ఆర్థిక ఇబ్బందులు ఎదురైనా, ప్రతి హామీని ప్రణాళికా బద్ధంగా అమలు చేస్తూ ప్రజల చెంతకు సంక్షేమం చేరవేస్తున్నట్లు డిప్యూటీ సీఎం తెలిపారు.