పశ్చిమాసియా సంక్షోభం.. భారత్‌కు సవాళ్లు: ప్రధాని

పశ్చిమాసియాలో కొనసాగుతున్న యుద్ధ పరిస్థితులపై ప్రధాని లోక్‌సభలో విస్తృతంగా మాట్లాడారు. ఈ సంక్షోభం ప్రపంచ ఆర్థిక వ్యవస్థపై ప్రభావం చూపుతోందని, భారత్‌కు కూడా అనేక సవాళ్లు ఎదురవుతున్నాయని తెలిపారు. ముఖ్యంగా ముడి చమురు, సహజవాయువు దిగుమతుల విషయంలో భారత్‌ గల్ఫ్‌ దేశాలపై ఎక్కువగా ఆధారపడుతుందని గుర్తుచేశారు. యుద్ధం కారణంగా వాణిజ్య రవాణా మార్గాల్లో అంతరాయాలు ఏర్పడుతున్నాయని, ఇది సరఫరా గొలుసుపై ప్రభావం చూపుతోందన్నారు.

పశ్చిమాసియా ప్రాంతంలో దాదాపు కోటి మంది భారతీయులు నివసిస్తున్నారని, వారి భద్రతపై ప్రభుత్వం ప్రత్యేక దృష్టి పెట్టిందని చెప్పారు. ఇప్పటివరకు సుమారు 3.75 లక్షల మంది భారతీయులను సురక్షితంగా స్వదేశానికి తరలించినట్లు వెల్లడించారు. అలాగే వేలాది మంది విద్యార్థులను కూడా తిరిగి తీసుకొచ్చామని తెలిపారు. అక్కడ పనిచేస్తున్న భారతీయ సిబ్బందికి అవసరమైన సహాయం అందించేందుకు భారత దౌత్య కార్యాలయాలు నిరంతరం పనిచేస్తున్నాయని పేర్కొన్నారు.

ఇంధన భద్రతపై కూడా ప్రధాని కీలక వ్యాఖ్యలు చేశారు. దేశీయంగా ఎల్పీజీ ఉత్పత్తిని పెంచుతున్నామని, పెట్రోల్‌, డీజిల్‌ సరఫరా ఎలాంటి ఆటంకాలు లేకుండా కొనసాగేందుకు చర్యలు తీసుకుంటున్నామని చెప్పారు. ప్రపంచవ్యాప్తంగా ఇంధన సరఫరాదారులతో నిరంతరం సంప్రదింపులు జరుపుతున్నామని తెలిపారు. గతంలో 27 దేశాల నుంచి మాత్రమే ఇంధనాన్ని దిగుమతి చేసుకునే భారత్‌, ఇప్పుడు 41 దేశాల నుంచి దిగుమతులు చేసుకుంటోందని వెల్లడించారు.

దేశంలో ప్రస్తుతం 53 లక్షల మెట్రిక్ టన్నుల వ్యూహాత్మక పెట్రోలియం నిల్వలు ఉన్నాయని, వాటిని 65 లక్షల మెట్రిక్ టన్నులకుపైగా పెంచే లక్ష్యంతో ముందుకు సాగుతున్నామని తెలిపారు. ఇథనాల్‌ మిశ్రమాన్ని పెంచడం ద్వారా ముడి చమురు దిగుమతులను గణనీయంగా తగ్గించగలిగామని చెప్పారు.

రైతుల విషయంలో కూడా ప్రభుత్వం అప్రమత్తంగా ఉందని ప్రధాని తెలిపారు. యూరియా, ఇతర ఎరువుల సరఫరాలో ఎలాంటి ఇబ్బందులు రాకుండా చర్యలు తీసుకుంటున్నామని చెప్పారు. ఈ సంక్షోభాన్ని సమర్థంగా ఎదుర్కొనేందుకు ప్రభుత్వ, పారిశ్రామిక రంగాలు కలిసి పనిచేస్తున్నాయని పేర్కొన్నారు.

చర్చలు, దౌత్యం ద్వారానే పశ్చిమాసియా సమస్యకు శాంతియుత పరిష్కారం సాధ్యమని ప్రధాని పునరుద్ఘాటించారు. అన్ని దేశాలు శాంతి మార్గాన్ని ఎంచుకోవాలని కోరారు.