ఖర్చు కాదు భాగస్వామ్యం.. సీఎస్ఆర్ నిధులపై రేవంత్ కొత్త దిశ

సమాజ అభివృద్ధికి చేసే ఖర్చును పెట్టుబడిగా మార్చాలని పిలుపునిస్తూ ముఖ్యమంత్రి ఎ.రేవంత్ రెడ్డి కార్పొరేట్ సంస్థలకు స్పష్టమైన దిశను సూచించారు. సీఎస్ఆర్ నిధులను కేవలం ఖర్చుగా కాకుండా ఫలితాలు ఇచ్చే భాగస్వామ్యంగా చూడాలని పేర్కొన్నారు. కార్పొరేట్ ప్రతినిధులతో జరిగిన సమావేశంలో విద్య, వైద్యం, జల వనరుల సంరక్షణపై ప్రభుత్వం ప్రత్యేక దృష్టి పెట్టిందని వివరించారు.

ప్రత్యేకంగా విద్య రంగాన్ని భవిష్యత్ పెట్టుబడిగా అభివర్ణించారు. రాష్ట్రంలో మొత్తం విద్యార్థుల్లో 44 శాతం హైదరాబాద్‌లోనే ఉన్నారని, వారికి నాణ్యమైన విద్య అందించడం సామూహిక బాధ్యత అని చెప్పారు. ప్రభుత్వంతో పాటు కంపెనీలు కలిసి పనిచేస్తే ప్రపంచ స్థాయి నైపుణ్యాలతో విద్యార్థులను తయారు చేయవచ్చని పేర్కొన్నారు.

సీఎస్ఆర్ నిధుల వినియోగంలో ఇప్పటివరకు స్పష్టమైన వ్యవస్థ లేకపోవడంతో ప్రత్యేక ప్రధాన కార్యదర్శిని నియమించినట్లు వెల్లడించారు. కంపెనీలు తమకు ఆసక్తి ఉన్న రంగాలను ఎంచుకొని నిధులను వినియోగించవచ్చని తెలిపారు. విద్య, వైద్యం మాత్రమే కాకుండా నైపుణ్య శిక్షణ, వారసత్వ కట్టడాల పరిరక్షణ, అడవుల సంరక్షణ వంటి రంగాల్లో కూడా అవకాశం ఉందని సూచించారు.

ఇప్పటికే కొన్ని ప్రముఖ సంస్థలు ముందుకు వచ్చాయి. రహేజా గ్రూప్, రాంకీ గ్రూప్ తలా యాభై కోట్లు, యశోద సంస్థ పది కోట్లు విద్యాభివృద్ధికి కేటాయించేందుకు సిద్ధమయ్యాయి. ఈ స్పందనను ముఖ్యమంత్రి స్వాగతించారు. కార్పొరేట్ ప్రతినిధులు కూడా ఇంతవరకు ఈ స్థాయిలో ఎవరూ సంప్రదించలేదని పేర్కొంటూ, ప్రభుత్వ చొరవను అభినందించారు.

ఇక్కడ కీలక అంశం ఒకటే. కంపెనీలు వినియోగిస్తున్న ప్రాంతాల్లోనే అభివృద్ధి బాధ్యత తీసుకోవాలి. స్థానిక మౌలిక వసతులను ఉపయోగించుకుంటున్న సంస్థలు తమ నిధుల్లో భాగాన్ని అదే ప్రాంతానికి కేటాయిస్తే అభివృద్ధి వేగం పెరుగుతుంది. ఈ విధానం అమలు ఎలా జరుగుతుందన్నదే ఇప్పుడు అసలు పరీక్ష.