హెచ్‌-1బీ వీసాలపై అమెరికా కీలక నిర్ణయం.. వేతనాలు పెంపు ప్రతిపాదన

టెక్‌ కంపెనీల్లో విదేశీ ఉద్యోగుల సంఖ్యను తగ్గించి స్థానిక అమెరికన్లకు ఎక్కువ ఉపాధి అవకాశాలు కల్పించేందుకు అమెరికా ప్రభుత్వం కీలక చర్యలకు సిద్ధమవుతోంది. ఇందులో భాగంగా హెచ్‌-1బీ వీసాదారుల వేతనాలను గణనీయంగా పెంచేలా అమెరికా కార్మిక శాఖ ప్రతిపాదనలు చేసింది. ఈ మార్పులు అమల్లోకి వస్తే విదేశీ ఉద్యోగుల సగటు వార్షిక వేతనం సుమారు 14వేల డాలర్ల మేర పెరిగే అవకాశం ఉందని అధికారులు తెలిపారు.

ప్రస్తుతం అమెరికాలో స్థానిక ఉద్యోగులతో పోలిస్తే హెచ్‌-1బీ వీసాదారులు సగటున 10,191 డాలర్లు తక్కువ వేతనం పొందుతున్నారని గణాంకాలు సూచిస్తున్నాయి. ముఖ్యంగా కంప్యూటర్‌, టెక్నాలజీ రంగాల్లో ఈ వ్యత్యాసం మరింత ఎక్కువగా ఉంది. ఈ పరిస్థితి కారణంగా తక్కువ వేతనంతో పనిచేసే విదేశీ ఉద్యోగులకే కంపెనీలు ప్రాధాన్యం ఇస్తున్నాయని సుదీర్ఘకాలంగా విమర్శలు వస్తున్నాయి. ఈ నేపథ్యంలోనే ఈ ప్రతిపాదనలు తీసుకొచ్చినట్లు అమెరికా అధికారులు వెల్లడించారు.

వాస్తవానికి హెచ్‌-1బీ వీసా ప్రత్యేక నైపుణ్యాలు కలిగిన ప్రతిభావంతుల కోసం రూపొందించబడింది. అయితే కొంతమంది యాజమాన్యాలు ఈ విధానాన్ని దుర్వినియోగం చేస్తూ తక్కువ వేతనంతో విదేశీ ఉద్యోగులను నియమిస్తున్నాయన్న ఆరోపణలు ఉన్నాయి. 2024 ఆర్థిక సంవత్సరానికి సంబంధించిన గణాంకాల ప్రకారం జారీ అయిన హెచ్‌-1బీ వీసాలలో 63 శాతం ఎంట్రీ లెవల్ ఉద్యోగులకే చెందినవని కార్మిక శాఖ వెల్లడించింది. ఇది ఈ విధానంలో ఉన్న లోపాలను స్పష్టంగా చూపిస్తున్నదని నిపుణులు చెబుతున్నారు.

ప్రతిపాదనల ప్రకారం నాలుగు స్థాయిల వేతన వ్యవస్థలో పెద్ద మార్పులు జరగనున్నాయి. ఎంట్రీ లెవల్ ఉద్యోగాలకు కనీస వేతనం 34 శాతం, లెవల్ 2 ఉద్యోగులకు 52 శాతం, లెవల్ 3 వారికి 70 శాతం, లెవల్ 4 ఉద్యోగులకు 88 శాతం మేర పెంచాలని యోచిస్తున్నారు. ఈ మార్పులతో కంపెనీలపై వేతన భారం కూడా గణనీయంగా పెరగనుంది. అంచనాల ప్రకారం విదేశీ ఉద్యోగులను నియమించే సంస్థలు ప్రతి సంవత్సరం అదనంగా సుమారు 6.56 బిలియన్ డాలర్ల వేతనాలు చెల్లించాల్సి ఉంటుంది.

ఈ ప్రతిపాదనలకు అధ్యక్షుడి ఆమోదం లభించిన తర్వాత అమల్లోకి వచ్చే అవకాశం ఉంది. ఈ మార్పులతో విదేశీ ఉద్యోగుల నియామకంలో కంపెనీలు మరింత జాగ్రత్తగా వ్యవహరించాల్సి ఉంటుంది. అలాగే స్థానిక అమెరికన్లకు ఎక్కువ ఉపాధి అవకాశాలు లభించే అవకాశముంది. అయితే ఇదే సమయంలో విదేశీ నైపుణ్యాలపై ఆధారపడే టెక్ కంపెనీలకు ఇది సవాలుగా మారవచ్చని నిపుణులు అభిప్రాయపడుతున్నారు.