సెలవు వివాదం హింసకు దారి… బ్యాంక్‌ మేనేజర్‌ హత్య కలకలం

ఉత్తరప్రదేశ్‌లోని గాజియాబాద్‌లో జరిగిన ఈ దారుణ ఘటన తీవ్ర సంచలనం సృష్టించింది.పంజాబ్ & సింధ్ బ్యాంక్ కు చెందిన ఓ శాఖలో పని చేస్తున్న సెక్యూరిటీ గార్డు తన మేనేజర్‌పై కాల్పులు జరపడం విషాదానికి దారి తీసింది.

పోలీసులు తెలిపిన వివరాల ప్రకారం, రవీంద్ర హుడా అనే వ్యక్తి ఆ బ్యాంకులో సెక్యూరిటీ గార్డుగా పనిచేస్తున్నాడు. సోమవారం రాత్రి అతడు మేనేజర్ అభిషేక్ కుమార్ (34) క్యాబిన్‌లోకి వెళ్లి తుపాకీతో కాల్పులు జరిపాడు. తీవ్రంగా గాయపడిన అభిషేక్‌ను సహచరులు వెంటనే ఆసుపత్రికి తరలించగా, అప్పటికే ఆయన మృతి చెందినట్లు వైద్యులు ధ్రువీకరించారు.

దర్యాప్తులో భాగంగా పోలీసులు రవీంద్రను, అతనికి సహకరించిన శిశుపాల్‌ను అరెస్టు చేశారు. విచారణలో రవీంద్ర తెలిపిన వివరాల ప్రకారం, గత కొన్ని నెలలుగా సెలవుల విషయంలో తనకు మేనేజర్‌తో వివాదాలు జరుగుతున్నాయి. సెలవులు నిరాకరించడం, జీతం నుంచి కోతలు విధించడం వంటి కారణాలతో ఇరువురి మధ్య తరచూ వాగ్వాదాలు జరిగేవని చెప్పాడు. ఈ మనస్తాపంతోనే కోపానికి గురై కాల్పులకు పాల్పడినట్లు వెల్లడించాడు.

మరణించిన అభిషేక్ కుమార్ బీహార్‌లోని పట్నాకు చెందినవాడు. గత ఏడాది గాజియాబాద్ శాఖకు బదిలీ అయ్యాడు. నిందితుడు రవీంద్ర ఆర్మీలో పనిచేసి 2018లో రిటైర్ అయినట్లు పోలీసులు తెలిపారు.

ఈ ఘటనపై కేసు నమోదు చేసి దర్యాప్తు కొనసాగిస్తున్నామని అధికారులు వెల్లడించారు. ఉద్యోగస్థల వివాదాలు ఎంతటి తీవ్ర పరిణామాలకు దారి తీస్తాయో ఈ సంఘటన మరోసారి గుర్తు చేసింది.