కాబూల్‌లో రక్తపాతం… ఆసుపత్రిపై దాడికి అఫ్గాన్ క్రికెటర్ల స్పందన

కాబూల్‌లోని ఓ ఆసుపత్రిపై జరిగిన వైమానిక దాడి ప్రపంచవ్యాప్తంగా తీవ్ర కలకలం రేపింది. ఈ ఘటనలో వందలాది మంది ప్రాణాలు కోల్పోయినట్లు వార్తలు వెలువడుతున్నాయి. ఈ విషాద ఘటనపై అఫ్గానిస్థాన్‌కు చెందిన ప్రముఖ క్రికెటర్లు తీవ్రంగా స్పందించారు. రషీద్ ఖాన్, మహ్మద్ నబీ, ఇబ్రహీం జద్రాన్, నవీన్-ఉల్-హక్ సోషల్ మీడియా వేదికగా తమ ఆవేదన వ్యక్తం చేశారు.

మహ్మద్ నబీ తన సందేశంలో ఈ దాడిని తీవ్రంగా ఖండిస్తూ, ఆసుపత్రిలో చికిత్స పొందుతున్న అమాయక ప్రజలు ప్రాణాలు కోల్పోవడం దురదృష్టకరమని అన్నారు. ఉద్దేశపూర్వకంగానైనా, ప్రమాదవశాత్తూ జరిగినా పౌర మౌలిక సదుపాయాలపై దాడులు చేయడం అనేది అంతర్జాతీయ చట్టాల ఉల్లంఘన అని పేర్కొన్నారు.

రషీద్ ఖాన్ కూడా ఈ ఘటనపై తీవ్ర ఆందోళన వ్యక్తం చేస్తూ, ఆసుపత్రులు, విద్యాసంస్థలు వంటి పౌర ప్రాంతాలను లక్ష్యంగా చేసుకోవడం యుద్ధ నేరమని అన్నారు. ఈ ఘటనపై సమగ్ర విచారణ జరిపి, బాధ్యులపై చర్యలు తీసుకోవాలని ఐక్యరాజ్యసమితి, మానవ హక్కుల సంస్థలను కోరారు.

నవీన్ ఉల్ హక్ ఈ దాడిపై ఆగ్రహం వ్యక్తం చేస్తూ, అమాయకులపై దాడులు ఏ విధంగానూ సమర్థించలేమని పేర్కొన్నారు.

ఈ ఘటనతో కాబూల్ నగరం విషాదంలో మునిగిపోయింది. మృతుల కుటుంబాలకు ప్రపంచవ్యాప్తంగా సానుభూతి వెల్లువెత్తుతోంది. యుద్ధ పరిస్థితుల్లో కూడా మానవతా విలువలను కాపాడాల్సిన అవసరాన్ని ఈ ఘటన మరోసారి గుర్తు చేసింది.